DILI, 05 outubru 2022 (TATOLI)—Ministra Saúde, Odete Maria Freitas Belo, informa iha tinan 2023, Ministériu Saúde haruka médiku sira atu kontinua bá estudu iha área espesialidade iha nasaun Cuba.
“Ita nafatin haruka médiku sira ba rai li’ur, atu kontinua sira nia espesialidade tanba agora daudaun Hospitál Nasionál Guido Valadares iha espesialista pediatria, obstretia, jinekolojia, sirujiaun no anestesia, maibé ita nafatin haruka ita nia mediku sira ba kontinua área ida ne’e, tanba ita hakarak kompleta médiku espesialista sira ne’e ba hospitál referál sira,” Ministra Odete Freitas Belo, hateten iha Palásiu Governu-Dili, kuarta ne’e.
Nia dehan la’ós haruka médiku de’it, maibé haruka mós Enfermeiru sira atu oinsá bele mai apoiu servisu médiku-sira nian.
Ministériu Saúde hahú prevee orsamentu millaun $1-resin hodi haruka médiku sira ba estudu iha Cuba.
Iha sorin seluk, Diretór Jerál Servisu Koorporativu Ministériu Saúde, Marcelo Amaral, hateten área espesialidade ne’ebé Timor-Leste seidauk iha rekursu mak iha sub espesilidade ba operasaun onkolojia.
“Ita nia médiku ba onkolojista iha, maibé ba área ne’ebé ita seidauk iha mak sub espesilaidade ema bolu dehan opera ba onkolojia. Hanesan ema sira ne’ebé mak monu ho kakutak sira ne’e fera ita haree oinsá hasai atu suku ida ne’e seidauk iha, nune’e ita tenki haruka ba eskola tan,” katak.
Tuir dadus rekursu umanu hosi Ministériu Saúde katak espesialista timoroan hamutuk 74 ne’ebé halo atendimentu iha Hospitál Nasionál Guido Valadares no Hopsitál referál sira iha Munisípiu.
Mediku espesialista 74 kompostu hosi área espesialista anestesia na’in haat, dentista na’in-rua, dermatolojista na’in-tolu, endrokolojia na’in-rua, espesialista ba tilun, kakorok no ibun na’in-rua.
Enkuantu, espesialista ba jenekolojia tolu, internista lima, intensiva emerjénsia lima, kardiolojia na’in-hitu, nefrolojia na’in-neen, objym neen. Oftamolojista lima, onkolojia rua, ortopedista rua, patolojia anatomi ida, patolojia klínika ida, pediatria haat, psikataria rua, polmonolojista rua, radiolojista rua no sirurjiaun neen.
Jornalista : Felicidade Ximenes
Editór : Florencio Miranda Ximenes
