DILI, 05 outubru 2022 (TATOLI)— Tribunál Rekusu (TR), admite Os Verdes de Timor sai ona partidu politiku foun iha Timor-Leste tanba kumpre ona rekezitu lei partidu polítiku no bele konkorre ona eleisaun parlamentár iha tinan 2023.
“Tribunál Rekursu admite ona partidu os Verdes de Timor, hanesan partidu polítiku ida iha Timor-Leste tuir lei, ho admisaun ne’e partidu Os Verdes de Timor bele konkorre ona iha eleisaun parlamentár 2023,” hateten Prezidente Tribunál Rekursu (PTR), Deolindo dos Santos, jornalista sira hafoin audénsia ho komisaun A Parlamentu Nasionál, kuarta ne’e.
Notísia relevante: Tribunál Rekursu admite Os Verdes de Timor sai partidu polítiku
TR admite Os Verdes de Timor tanba iha faze verifikasaun dokumentu inskrisaun kumpre ona Lei partidu polítiku iha artigu 13, lei númeru 3/2004, 14 abríl, no alterasaun dahuluk ne’ebé introdús iha lei númeru 2/2016, 3 fevereiru.
Hafoin simu dokumentu hosi Ministériu Justisa, hahú kedan halo verifikasaun ba dokumentu ho bazeia ba lei partidu politiku nian.
Partidu Os Verdes de Timor hanesan partidu polítiku foun iha Timor-Leste tanba iha publikasaun iha rádiu nasionál, hanesan kritéria ida ne’ebé impoin iha artigu 15, númeru 2 refere iha lei 3/2004.
Tanba tuir lei partidu politiku katak partidu ida atu hetan legalidade hanesan partidu tenke halo inkrisaun liu hosi Ministériu Justisa atu fó aseitasaun mak submete dokumentu partidu refere, ba Tribunál Rekursu atu haree.
Nune’e Tribunál Rekursu molok atu rejistu definitivu ba kandidatu partidu ida hodi sai partidu polítiku tenke liuhosi rejistu provizóriu, hafoin públika ona iha rádiu, mak TR deside atu rejistu definitivu hanesan partidu politiku ida.
Iha loron 05 abríl, Ministériu Justisa (MJ), liuhosi Diresaun Nasionál Jerál Rejistu aprova pedidu inskrisaun kandidatu partidu polítiku Os Verdes de Timor tanba kumpre rekizitu ba inskrisaun ho apoiante 20.000.
Tuir lejizlasaun, hafoin Ministériu Justisa halo autentikasaun no aprova pedidu kandidatu partidu polítiku ne’e iha prazu loron rua nia-laran, haruka dokumentu hotu partidu Os Verdes ba iha Tribunál Rekursu atu hetan legalidade.
Partidu lima hahú lakon ona estatutu
Entretantu, Prezidente Deolindo dos Santos, informa daudaun ne’e rejista ona partidu polítiku hamutuk lima mak lakon ona estatutu no sei labele konkorre ona eleisaun parlamentar iha tinan oin.
“Iha partidu lima maka durante ne’e lakon estatutu hanesan partidu polítiku hanesan Associação Sosiál Demokrata Timorense (ASDT), Partidu Povu Timor (PPT), KOTA no partidu rua seluk ne’ebé ha’u ladun lembra ona,”nia afirma
Daudaun, PTR dehan iha partidu polítiku hamutuk 22 ejiste, hosi númeru ne’e partidu lima mak lakon ona estatatu, nune’e hela partidu hamutuk 17 mak sei hamutuk ho kandidatu partidu foun sira seluk atu konkorre iha eleisaun parlamentár tinan oin.
“Partidu sira ne’e bele halo sira nia konsolidasaun iha tinan ne’e, maibé lei la permite ona atu sira kompete iha eleisaun tinan oin, tanba sira lakon ona sira estatutu hanesan partidu,” nia afirma.
Notísia relevante: Ministru Justisa indefere direitamente kandidatu partidu Os Verdes
Jornalista: Natalino Costa
Editór : Florencio Miranda Ximenes
