CJP-DM realiza treinamentu ba estudante ESGP Suai
COVALIMA, 05 outubru 2022 (TATOLI) – Komisaun ba Justisa no Paz Dioseze Maliana (CJP-DM-Sigla Portuguese), realiza treinamentu konaba domin, respeitu, no relasaun ba estudante sira iha Eskola Sekundariu Geral Publika (ESGP) Suai, Covalima.
“Ami-nia objetivu fahe informasaun relasiona ho domin, respeitu no relasaun,atu prevene problema sosial mosu iha komunidade sira-nia leet. Ezemplu, hanesan joven feto no mane ida kria relasaun domin la ho responsabilidade bele hamosu isin rua sedu no soe bebe hodi estraga futuru joven sira nian,” Ofisiál Programa ba Protesaun iha CJP-DM, Januario da Cruz dehan ba jornalista iha salaun, ESGP Suai, Covalima.
Nia dehan, CJP-DM fo treinamentu ida-ne’e hodi fahe informasaun ba joven sira liu-liu estudante atu labele monu iha risku hanesan problema sosiál liu-liu relasaun domin ne’ebé la ho responsabilidade.
Ho treinamentu ida-ne’e, nia hatutan bele fó hanoin ba estudante sira hodi hatene nune’e bele redús kualker tipu problema ne’ebé atu akontese iha komunidade nia leet.
“ Ita-nia foku prinsipal mak hakarak atinji hodi redus violensia ho tipu saida de’it iha ita-nia sosiedade nia le’et,” nia hateten.
Antes ne’e, Komisaun ba Justisa no Paz Dioseze Maliana, iha loron segunda, 3 outobru 2022, fó ona treinamentu konaba Domin, Respeitu, no Relasaun ba estudante iha ensinu sekundáriu Kátolika Ave Maria Suai.
Jornalista : Celestina Teles
Editóra : Armandina Moniz
