VIQUEQUE, 05 outubru 2022 (TATOLI)–Diresaun Nasionál Transporte Terreste (DNTT) munisípiu Viqueque, kuarta ne’e, hahú fó teste eskrita karta kondusaun ba membru Polísia Nasionál Timor Leste (PNTL) hamutuk na’in-20.
“Daudaun ne’e ami halo hela koresaun ba sira-nia eskrita ezame nian, ne’ebé sei ramata iha lorokraik, ida ne’ebé mak liu teste mak sei kontinua ezame prátika ka tama roda, ne’ebé sei akompaña hosi Polísia Unidade Tránzitu no funsionáriu DNTT,” Diretór Servisu DNTT munisípiu Viqueque, Elvino da Cruz, hateten ba Agência Tatoli, iha ninia knaar fatin, Beloi, kuarta ne’e.
Notísia relevante: DNTT Viqueque hahú halo atendimentu karta kondusaun PNTL iha fulan oin
Ezame prátika sei realiza iha edifísiu Komandu PNTL munisípiu Viqueque, lorokraik ne’e ba karta kondusaun motoriza.
“Membru seluk ne’ebé seidauk tuir teste eskrita ne’e ami sei prepara ba loron-haat mai tan mak ami foin teste, tanba daudaun ne’e sei iha membru Polísia na’in-60. Prosesu sei la’o hela, loron 20 outubru foin rona rezultadu sé mak liu hodi hetan karta kondusaun,” nia akresenta.
Tuir lista ne’ebé aprezenta hosi komandu PNTL munisípiu Viqueque, membru hamutuk na’in-80, maibé iha limitasaun sala, nune’e hafoin atendementu karta kondusaun ba membru Polísia ramata maka DNTT Viqueque loke ba públiku hodi rejista ba karta kondusaun.
Jornalista : Vitorino Lopes da Costa
Editora : Julia Chatarina
