iklan

EKONOMIA, HEADLINE, MUNISÍPIU, OÉ-CUSSE (RAEOA)

Empreza Am-Lhichoe finaliza ona projetu reabilitasaun estrada rurál iha Nítibe

Empreza Am-Lhichoe finaliza ona projetu reabilitasaun estrada rurál iha Nítibe

Prezidente Autoridade RAEOA hamutuk ho tékniku hosi Obra Públika fiskaliza projetu manutensaun no reabilitasaun estrada rurál. Imajen mídia ZEESM.

OÉ-CUSSE, 05 outubru 2022 (TATOLI) – Empreza lokál Am-Lhichoe Unipesoál Lda, daudaun ne’e konklui ona projetu realibitasaun estrada rurál ho distánsia kilometru-sia, hahú hosi suku Lela-Ufe liga ba suku Ban-Afi, bairru Kusi iha sub-rejiaun Nítibe tanba obra ne’e atinje ona 100%.

Diretór Rejionál Infraestrutura, Candido dos Reis Amarál, informa, projetu ne’e hahú iha tinan ne’e, ho objetivu atu fasilita komunidade lori produtu ba merkadu.

“Manutensaun estrada rurál hosi suku Lela-Ufe liga ba suku Ban-Afi, bairru Kusi ho distánsia kilómetru sia atinje ona 100%. Projetu ne’e ezekuta hosi Am-Lhichoe, hein atu konklui serbisu ki’ik balu, hanesan mós Lifau Indah ezekuta reabilita estrada rurál hosi Bobokase sa’e ba Kutete kuaze 90%, iha tempu badak sei finaliza ona,”. Candido Amarál, hatete iha Oé-Cusse, kuarta ne’e.

Nia informa, projetu ne’e ezekuta ho valór orsamentu hamutuk $162,173.89 ho durasaun serbisu durante fulan-haat, maibé atraza uitoan tanba mobilizasaun materiál liga mós ho distánsia.

“Maibé tanba esforsu no responsabilidade, entaun empreza esforsu to’o remata serbisu ne’e ho susesu tanba projetu ne’e pakote inklui bee-dalan no dreinajen,” nia afirma.

Nune’e mós iha reabilitasaun estrada rurál kontinuasaun hosi suku Abani, aldeia Haemnanu, sub-rejiaun Pássabe ba suku Malelat, ho distánia kilometru ualu, ne’ebé ezekuta hosi empreza Asis Tono Unipesoál Lda, ho valór kontratu $200,070,00, progresu daudaun ne’e atinje ona 60%, nune’e hein katak empreza sei aprezenta jestaun di’ak tanba sira sei halo kompromisu atu haka’as serbisu ne’e molok udan monu-rai tenke termina ona serbisu.

“Iha segunda semana ne’e Prezidente Autoridade halo ona fiskalizasaun hamutuk ho tékniku sira iha Obra Públika, ba projetu estrada reabilitasaun estrada hotu-hotu maibé empreza Am-Lhichoe mak konklui ona, tán ne’e maka Prezidente ba atu observa no haree katak kapasidade empreza iha baze preparadu atu kontinua serbisu, tán ne’e ohin, kuarta ne’e sei enkontru ho empreza sira hotu, kona-bá manutensaun no reabilitasaun estrada rurál sira tenke antes akontese udan,” nia katak.

Kona-bá reabilitasaun estrada rurál hosi Kusi, suku Ban-Afi iha sub-rejiaun Nítibe liga ba suku Malelat, sub-rejiaun Pássabe atinje ona 50%, tanba difikuldade empreza maka distánsia mobilizasaun rai-henek, mai to’o kedan Oé-Cusse vila iha mota Kinloke.

Entaun Diresaun Rejionál Infraestrutura hato’o ona instrusaun ba empreza tenke mobiliza rai- henek hosi Kinloke, tanba ne’e kompromisu ona laiha razaun seluk atu mobiliza rai-henek hosi fatin seluk.

Xefe suku Lela-Ufe, sub-rejiaun Nítibe, José Neno Sila, agradese tanba estrada ne’ebé reabilita iha suku Lela-Ufe kuaze termina ona, atubele tulun komunidade no transporte sira bele asesu ho di’ak.

“Ha’u haree kompañia atu remata ona, ne’ebé ami hanesan autoridade komunitáriu agradese ba Autoridade RAEOA, tanba hadi’a ona ami-nia estrada sira-ne’e, ba futuru bele fasilita komunidade no mós transporte sira bele asesu ho di’ak,” nia akresenta.

Notísia relevante: RAEOA aloka millaun $4-resin ba projetu manutensaun-reabilitasaun estrada rurál

Jornalista       : Abílio Elo Nini
Editór             : Evaristo Soares Martins

iklan
iklan

Leave a Reply

iklan
error: Content is protected !!