DILI, 05 outubru 2022 (TATOLI)—Ministru Administrasaun Estatál (MAE), Miguel Pereira de Carvalho, aprezenta proposta rua iha reuniaun Konsellu Ministru (KM), kuarta ne’e, ne’ebé hetan ona deliberasaun.
“Projetu sira ne’e delibera atu autoriza abertura prosedimentu aprovizionamentu ho tipu ajuste diretu ba adjudikasaun kontratu públiku ba konstrusaun Sentru Akollimentu Multifunsaun Dili,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Manleuana no Metinaro sai sentru akollimentu multifunsaun ba vítima inundasaun
Sentru ne’e ho objetivu vítima asidente grave no katástrofe atu hela provizóriamente, nune’e ema ka agregadu familiár sira ne’ebé afeta ona, projetu ka medida reordenamentu territóriu ka rekonversaun urbanístika ka projetu konstrusaun, reabilitasaun ka haluan infraestrutura públika ne’e, sein prejuizu mós atu integra fatin sira ne’ebé destina ba uzu komersiál no uzu natureza koletiva sira seluk.
Projetu ne’e inklui área rezidensiál ida ho apartamentu besik 162, zona komersiál no kultura, refeitóriu ida ba ema besik 300, auditóriu ida no sentru atendimentu médiku ida.
Projetu seluk mak kona-ba prosedimentu aprovizionamentu, liuhosi konkursu públiku internasionál ba adjudikasaun konstrusaun edifísiu foun administrasaun munisípiu Manatuto nian.
“Edifísiu ne’e iha andár tolu, iha besik gabinete 20 no sei permite besik ema 200 bele serbisu simultáneu. Konstrusaun ne’e sei finaliza iha tinan 2025,” nia dehan.
Jornalista : Antónia Gusmão
Editora : Julia Chatarina
