BAUCAU, 05 outubru 2022 (TATOLI) – Projetu reabilitasaun estrada diresaun postu administrativu Venilale ba suku Uaioli liuhosi fundu infraestrutura dadaun ne’e atinje ona 21 %.
Diretór Servisu Munisipál Obra Públika Baucau, Pedro Alexandre Guterres Pereira, esplika, tipu projetu mak reabilitasaun estrada diresaun hosi postu Venilale ba suku Uaioli hamutuk pakote tolu ho tótal distánsia kilómetru 8,6.
Projetu reabilitasaun ne’e ezekuta hosi kompañia tolu ho durasaun kontratu tinan-ida, hahú juñu 2022 to’o juñu 2023.
“Bainhira situasaun udan, problema sosiál, ambientál ka iha impedimentu ruma, ita sei fó prolongamentu atu sira kompleta serbisu bazea ba pedidu ne’ebé hato’o,” Diretór Servisu Munisipál Obra Públika Baucau informa ba Tatoli iha Vila Nova, kuarta ne’e.
Kompañia tolu ne’e komposta hosi Putra Baucau Unipesál, Lda implementa projetu ho distánsia kilometru tolu ho orsamentu $ 666.971,12.
Kompañia Macalaco cons unpesoal, Lda implementa obra ne’e ho kilómetru tolu to’o neen ho orsamentu $ 490.661,40 no kompañia Morende cons.unipesál, Lda, kaer hosi kilómetru neen to’o 8,5 ho orsamentu $ 365.170,02.
Progresu serbisu hosi projeitu refere hanesan pakote dahuluk ne’ebé rehabilita hosi kompañia Putra Baucau unipesál, Lda atinji ona 11.24%.
Pakote daruak hosi Macaloco cons.unpesoal, Lda atinje ona 19.66% no pakote datoluk atinje ona 33.21%, ne’ebé responsabiliza hosi kompañia Morende cons.unipesál,lda.
“Ita koordena nafatin ho administradór postu, xefe suku no aldeia atu ajuda malu serbisu ne’e la’o lalais,” Pedro Pereira akresenta.
Serbisu Munisipál Obras Publiku Baucau destaka enjeñeiru na’in-neen komposta hosi nasionál na’in-tolu no munisípiu na’in-tolu no supervizór hodi superviziona direitamente progresu serbisu iha fatin projeitu inklui halo koordenasaun ho autoridade postu, suku no komunidade relasiona ho implementasaun projetu ne’e.
Jornalista : Natalino Belo
Editór : Evaristo Soares Martins
