DILI, 06 outubru 2022 (TATOLI)-Governu, liuhosi Ministériu ba Asuntu Parlamentár no Komunikasaun Sosiál (MAPKOMS), tuir planu iha tinan ne’e sei instala “Torre” iha munisípiu tolu (3), hanesan Lautem, Maliana no Ainaro.
“Ami-nia planu atu instala tore iha munisípiu tolu ba tinan 2022 no nia prosesu dokumentu ba projetu ne’e iha ona CNA (Komisaun Nasionál Aprovizionamentu) atu lansa nia konkursu. Tanba, iha fulan jullu ami hatama ona dokumentu ba iha CNA, tanba ADN (Ajénsia Dezenvolvimentu Nasionál) verifika hotu haruka ona ba sira (CNA), entaun dadaun sira iha ona faze atu buka kompañia nune’e bele kaer projetu ne’e,” Diretór Finansa MAPKOMS, Adriano Monteiro, hateten ba Ajénsia Tatoli iha nia knaar fatin, Díli, kinta ne’e.
Tuir nia, torre ne’ebé Governu, liuhosi MAPKOMS sei instala ba munisípiu tolu mak iha Lospalos, área Naunil, Maliana iha área Bobonaro, suku Tapo no Ainaro, área Maubise iha suku Bobonaro.
“Entaun, ita-nia objetivu ba instalasaun torre ne’e atu fó kontinuasaun ba prosesu dijitalizasaun ne’ebé MAPKOMS ho SEKOMS iha tinan kotuk la’o ona, hosi instalasaun torre ne’e hanesan torre rua (2) kona-ba dijitál ne’ebé instala ona iha Fatuahi no Liquiça,” nia esplika.
Entaun, torre ne’ebé instala ona iha Fatuahi no Liquiça, tanba iha Díli populasaun sira komesa uza ona “Set Box”.
“Tanba, iha tinan kotuk, MAPKOMS komesa fahe “Set Box” ne’ebé oferese hosi Governu Xina mai populasaun sira, hosi ne’e konsege fahe ba área sira ne’ebé instala ona torre. Entaun, atu kontinua ba tinan ne’e ami iha orsamentu MAPKOMS nian, tau nafatin tore tolu ne’ebé agora planea atu konstroi tan,” nia afirma.
Entaun, ho ida ne’e ekipa MAPKOMS kontinua halo tan identifikasaun ba fatin atu harii tan torre, tanba ne’e ekipa dadaun identifika iha terrenu.
“Nune’e, iha tinan oin bele kontinua nafatin harii tan torre. Tanba, Governu Xina no Governu Timor mós iha ona akordu atu fó kontinuasaun ba dijitalizasaun ne’e,” Diretór ne’e akresenta.
Tanba ne’e, tuir planu ne’ebé iha katak Oitavu Governu liuhosi MAPKOMS ba oin sei instala tore iha territóriu tomak.
“Maibé, depende ba orsamentu ne’ebé aloka mai MAPKOMS, entaun ami tau tuir orsamentu ne’ebé kada tinan aloka mai iha MAPKOMS,” nia akresenta.
Notísia relevante:Tinan ne’e MAPKOMS instala torre RTTL,E.P iha Tapo
Jornalista : Nelia Fernandes
Editór : Rafy Belo
