Operasaun animal iha Covalima, ekipa task force oho 10 resin
COVALIMA, 06 outubro 2022 (TATOLI) – Ekipa task force halo operasaun ba komunidade nia animal ne’ebé husik livre iha vila-laran. Hosi operasaun ne’e, ekipa konsege kaer no oho animal 10-resin. Operasaun ne’eb’e halao bazeia ba dekretu lei ijiene ordem públika No.33/2008.
“Implementasaun jestaun lei ijiene ordem públiku ne’e, ita hahú implementa iha postu administrativu Tilomar no iha postu Suai ne’ebé ita konsege oho ona komunidade nia animal hanesan bibi kuaze 10-resin ”, Sekretáriu Administradór Munisípiu Covalima, Francisco de Jesus Alves hateten ba jornalista iha resintu Administrador Munisipíu Covalima, Sukaer-laran ,kinta ne’e.
Nia isplika, ekipa task force halo ona operasaun ba animal dahuluk iha postu administrativu Tilomar. Animal ne’ebe hetan kaer ho oho ne’e entrega ba instituisaun karidade. Maibé ekipa task force sei halao tan operasaun animal ba faze daruak.
Razaun ekipa task force, halao operasaun, tuir Francisco bazeia ba rezultadu reuniaun konsellu municipal, ne’ebe fo sai katak bainhira ekipa oho animal sei entrega fali ba nia nain. Maibe, kuandu komunidade la koñese animal ne’e, sei lori ba instituisaun karidade.
Hafoin halo ona operasaun iha postu rua tuir planu ekipa task force mós sei hala’o sensibilizasaun lei ijiene ordem públika ba komunidade iha postu administrativu Maucatar.
Jornalista : Celestina Teles
Editóra : Armandina Moniz
