DILI, 06 outubru 2022 (TATOLI)-Primeiru Ministru (PM), Taur Matan Ruak, hateten nia-parte fiar katak Ró Haksolok sei mai Timor-Leste.
Notísia relevante: Prezidente RAEOA garante Ró Haksolok sei mai iha Timor-Leste
“Ha’u fiar katak (Ró Haksolok) sei mai, tanba ita konsege sosa saham kompañia (asoens) ne’e barak liu ida ne’e, sinál mai”, Xefe Governu ba jornalista sira hafoin enkontru semanál ho Prezidente Repúblika iha Palásiu Prezidensiál Bairru Pite, kinta ne’e.
Empreza ne’ebé governu kontrata hodi halo konstrusaun ba Ró Haksolok, nia dehan bankarota ona, nune’e TL sosa asoens ho pursentu 90-ital. “Portantu kompañia ne’e agora ita nian, saida mak ita halo, husu ba nia halo hotu tiha Ró ne’e depois nia halo fali atividade seluk”, esplika.
Ida ne’e investimentu hosi Rejiaun Administrativa Espesiál Oé-Cusse Ambenu (RAEOA). Tanba ne’e, xefe ezekutivu ne’e dezafia atu labele deziste.
Semana kotuk, Prezidente RAEOA, Arsénio Bano, akompaña hosi Eis Prezidente RAEOA, Mari Alkatiri, bá Portugál hasoru empreza Atlanticeagle Shipbuilding, (Antigu Estaleiru Navais Mondego), Bruno Costa (Sósiu Jerente) ho Duarte Sousa (Jerente).
“Prezidente RAEOA ko’alia iha televizaun katak sei mai no ha’u fiar katak sei mai”, afirma tan eis Prezidente Repúblika ne’e.
Tuir dokumentu kona-ba relatóriu auditoria kámara kontas (CdC, sigla portugés) nian ba RAEOA-ZEESM númeru 1/2018 ho númeru prosesu 2/2016/AUDIT-S/CC haktuir kontratu ba dezeñu, konstrusaun no fornesimentu, asina hosi Ministru Transporte no Komunikasaun iha 22 setembru 2014 ho Atlanticeagle Shipbuilding hodi entrega ferry ne’ebé sei tula ema 102, viatura sira no sasan negósiu, entre Dili, Oé-Cusse no Ataúro.
Hosi kontratu ne’ebé halo, akontese alterasaun dahuluk iha 15 abríl 2015, tuir fali iha 22 janeiru no 2 junu 2016 ho “esperansa” sei entrega ferryboat mai Dili iha 30 outubru 2015 no Oé-Cusse sei simu iha novembru, maibé la akontese no situasaun hanesan ne’e kontinua to’o jullu 2018.
Dokumentu ne’e husu ba governu atu haruka kópia kontratu ne’ebé ministériu transporte no komunikasaun halo ho Empordef/Estaleiros Navais de Viana do Castelo hodi sosa ekipamentu ba ferry no mós dokumentu kona-ba pagamentu sira.
Husu mós ba RAEOA atu manda ba tribunál sobre; kontratu konstrusaun, pagamentu ba ferry ho Atlanticeagle no kopia kontratu kona-ba sosa ekipamentu ne’ebé falta ba konstrusaun ferry tuir pagamentu ne’ebé halo ona.
Notísia relevante: PN aprova millaun $127 ba RAEOA inklui millaun $14 finaliza Ró Haksolok
Jornalista : Nelson de Sousa
Editora : Rita Almeida
