OÉ-CUSSE, 06 outubru 2022 (TATOLI) – Diresaun Konservatóriu Rejistu Sivíl Notariadu iha Rejiaun Administrativa Espesiál Oé-Cusse Ambeno (RAEOA), hatama ona reseita rihun $39,350 ba iha kofre Estadu liuhosi tratamentu pasaporte eletrónika.
“Relatóriu iha rejistu sivíl rekolla kona-bá trata pasaporte eletróniku hahú hosi primeiru to’o terseiru trimestre hosi janeiru to’o setembru tinan ne’e hamutuk rihun $39,350, taxa ne’e rekolla iha tipu tolu, bele $50 durasaun foti loron 10, no $75 durasaun atu foti loron tolu no $100 foti iha loron ida,” Diretór Servisu Rejistu Sivíl Notariadu RAEOA, José Ase Neno Kolo, informa ba Agência Tatoli iha Oé-Cusse, kinta ne’e.
Nia informa, iha fulan rua de’it hosi agostu to’o setembru mak taxa barak liu kompara ho fulan sira seluk, tanba durante fulan rua ne’e konsege rekolla rihun $15,025, tanba iha agostu de’it ema hasai pasaporte hamutuk 125 ho nia taxa rihun $7,475 iha setembru totál ema hasai hamutuk 128 ho nia taxa $7,700.
Nia afirma, maske kontribui taxa boot ba kofre Estadu maibé iha difikuldade barak maka serbisu rejistu sivíl enfrenta preokupasaun komunidade tanba laiha serteza atu foti dokumentu pasaporte ne’e, tanba kona-bá planu atu foti tenke iha nasionál Dili hodi hetan asinatura hosi diretór nasionál.
“Kaundu hasai $50 tenke foti iha loron 10, maibé dalaruma la akontese tanba prosesu imprime no asinatura iha Dili, hanesan mós ho $75 loron tolu tenke foti no $100 tenke foti maibé dalaruma labele,” nia afirma.
Tan solusaun ne’e iha maka, kada rekerente tenke konfirma ho família balu iha Dili maka lori dokumentu evidénsia hosi Oé-Cusse nian, aprezenta iha nasionál maka foin bele foti.
“Ami funsionáriu iha Oé-Cusse mós defisíl atu ba foti iha Dili ho tempu determinadu tanba bainhira viajen persiza autorizasaun hosi Autoridade RAEOA kuandu aprova tarde ne’e sai preokupasaun ba rekerente sira, karik iha autorizasaun mós persiza fasilita di’ak ba transporte no alozamentu ba funsionáriu ne’ebé viajen, entaun solusaun di’ak maka husu tulun hosi família iha nasionál atu foti,” nia afirma.
Jornalista: Abílio Elo Nini
Editór: Evaristo Soares Martins
