COVALIMA, 06 Outubro 2022 (TATOLI) – Proses sensus populasaun tinan 2022 iha Covalima remata ona, maibe, Xefi Departamentu Estatístika, Munisípiu Covalima, Fernando Ferreira seidauk bele fo sai total dadus kompletu, tanba sei elabora hela.
“ Sensus populasaun tinan 2022, termina ona iha loron 5 outubru ne’e. Maibé dadus ami seidauk bele fó sai, tanba dadaun ne’e prosesu elobora ho nune’e seidauk bele fó sai informasaun total populasaun no xefi família ne’ebé mak partisipa ona iha sensus ne’e rasik,” nia dehan ba Tatoli iha Covalima.
Ho ida ne’e nia hatutan, governu liuhosi Diresaun Gerál Estatístika (DGE Sigla-Portugés) rekola mos ekipamentu ne’ebé fasilita enumeradór no supervisor sira hala’o sensus populasaun tinan 2022 iha Covalima.
Nia mos dehan tan katak, razaun seidauk bele fó sai dadus populasaun ne’ebé partisipa iha sensus populasaun 2022, tanba seidauk konklui no seidauk simu relatóriu hosi koordenadór postu administrativu sira.
“Maske koordenadór postu sira seidauk relata relatóriu ho nune’e ita seidauk hatene persentasi hira. Ha’u fiar sensus populasaun konklui hotu ona maibé relatóriu mak seidauk finaliza,” nia dehan.
Sensus populasaun tinan 2022 hahú iha loron 5 fulan setembru ne’ebé remata ona iha loron 5 outubro 2022.
Jornalista : Celestina Teles
Editóra : Armandina Moniz
