SSC rejista 31% labarik sofre má nutrisaun iha postu Maucatar
COVALIMA , 06 Outubro 2022 (TATOLI) – Servisu Saúde Covalima (SSC) liuhosi departamentu Nutrisaun rejista 31% labarik sofre má nutrisaun iha postu administrativu Maucatar, Munisípiu Covalima.
“Tuir resultadu identifika labarik má nutrisaun iha Postu Administrativu hitu (7) hosi suku 30. SSC identifika labarik sira ne’ebé sofre má nutrisaun ho tipu todan ne’ebe la hanesan ho labarik bai-bain iha postu Maucatar ho 31% kompara ho postu saude sira seluk,” Koordenadór nutrisaun Munisípiu Covalima, Eugevio de Araujo, dehan ba jornalista iha salaun Aministrador Munisipiu Covalima, sukaer laran, kinta ne’e.
Nia isplika, SSC identifika labarik sofre má nutrisaun bazea ba kontrola rutina iha kada postu Administrativu sira hanesan iha Maucatar 31 %, Tilomar (9%), Fohorem (7%), Fatumea (5%), Zumalai (5%), Suai 2% no postu administrativu Fatululik ho 1%.
Tanba ne’e, nia dehan atu prevene má nutrisaun SSC halo ona asaun hodi distribui vitamin A ba labarik sira nomos fo aimoruk lumbriga no super sereal ba inan isin rua sira.
Nia mos husu atu ho problema má nutrisaun iha Covalima sai nu’udar ema hotu nia responsabilidade la’os deit husi parte saúde nian, maibé persija setór hotu nia intervensaun tuir área ida-idak nian hodi resolve.
“Ami rekomenda ba setór sira hanesan Ministeriu Agrikultura no Peska, diresaun Seguransa Alimentar, Agua Saneamentu no Ambiente, atu identifika sustentabilidade ai-han iha nivél uma kain no produsaun aihan, bee mos, no família ne’ebé vuneravel iha área ne’ebé labarik hetan má nutrisaun aas,” nia husu.
Jornalista : Celestina Teles
Editóra : Armandina Moniz
