DILI, 06 outubru 2022 (TATOLI) – Xefe Suku Motael, Postu Administrativu Vera Crúz, Munisípiu Dili, hateten subsídiu $200 fim do ano nian, Suku Motael submete ona fixa família hamutuk 1.540 ba Postu Vera Crús.
“Hosi xefe família 1.540 ne’e, iha faze dahuluk ami hatama ona ami-nia xefe família hamutuk 1.293 ba Administrtaivu Vera Crúz no xefe família foun ne’ebé hatama ikus mak 247, hosi númeru ne’e ami mós hatama eis-Prezidente Repúblika, Francisco Guterres “Lu Ólo”, Prezidente Parlamentu Nasionál, Aniceto Guterres no mós deputadu Aderito Hugo,” Luis António Viegas, dehan ba Agência Tatoli, iha nia servisu fatin, Motael, kinta ne’e.
Nia dehan hosi xefe família 247 ne’e la’ós rejistu foun maibé sira ne’e rejistu antes maibé foin mak atu hetan subsídiu $200 iha fim do ano ne’e no sira ne’e mesak funsionáriu no iha balun ne’ebé mak servisu iha NGO balun.
Entretantu nia dehan iha suku Motael ne’e rasik rejistu tan xefe família ne’ebé mak foin harii uma-kain besik 40 no sira ne’e sei la hetan direitu ba subsídiu $200 ne’e.
Tanba tuir dekretu lei 37/2022 katak subsídiu ne’e sei atribui ba uma-kain iha Timor-Leste no dekretu lei ne’e mós dehan sé mak sai benefisiáriu ne’e mak uma-kain sira-ne’ebé mak rejistu iha 20 fevereiru 2022 ne’e.
Jornalista : Osória Marques
Editór : Zezito Silva
