AMC identifika PAAS la prenxe livru populasaun iha suku
COVALIMA, 07 outubru 2022 (TATOLI) – Administrasaun Munisípiu Covalima (AMC) liuhosi Diresaun Apoiu sosiedade sivil no Organizasaun Komunitária identifika Pesoál Apoiu Administrasaun Suku (PAAS) la prenxe livru rejista populasaun sira iha suku.
“Ami halo monitorizaun ba xefi suku no xefi aldeia hotu identifika PAAS la priénse livru rejistu populasaun ne’ebe ami fahe. Razaun la priénse tanba saida to agora ami seidauk hatene. Ami fahe livru ne’e hamutuk 18,” Diretór Apoiu Sosiedade Sivil no Organizasaun Komunitária, Francisco Mendonça ‘Rannakali’ dehan ba Tatoli iha salaun AMC, Sukaer-laran, sesta ne’e.
Nia dehan, hafoin finaliza monitorizaun diresaun mós hasai ona sirkular hodi obriga PAAS hodi priénse livru hirak ne’e, tanba ne’e ba trimestre dahaat ekipa sei halo monitorizasaun.
“Ami hasai ona sirkular obriga PAAS sira atu prenxe livru sira-ne’e, liuhosi sirkular ba trimetre dahaat. Ami tenke tuun ba halo monitorizasaun,“ nia hateten.
Bazea ba Orientasaun livru rejitu populasaun ne’ebé distribui hotu ona no tenke rejista populasaun sira-nia naran. Tanba, wainhira atu simu subsidiu anuál sei uza livru refere hodi haree fali naran.
Jornalista : Celestina Teles
Editóra : Armandina Moniz
