DILI, 07 outubru 2022 (TATOLI)-Ezekusaun Orsamentu jerál Estadu (OJE) 2022 iha trimestre datoluk (jullu-setembru) ne’e, Sentru Nasionál Formasaun Profesionál (CNFP, sigla portugés) Becora, atinje ona 67,75%.
“Iha trimestre datoluk ne’e, Sentru Nasionál Formasaun Profesionál Becora ezekuta ona 67,75% iha Orsamentu Jerál Estadu (OJE) 2022, ne’ebé ekivalente ho orsamentu hamutuk $613,187,” Xefe Departamentu Administrasaun Finansa, Pedro de Jesus, informa ba Ajénsia Tatoli iha nia fatin, Díli, sesta ne’e.
Tuir nia, hosi montante orsamentu $613,187 ne’e ezekuta ba kategória haat (4), ne’ebé kompostu hosi Aset manejement ho nia ezekusaun 51% ho nia saldo $54.316.93 ezekuta hosi orsamentu $106.288, programa formasaun profesionál 92% ho nia saldo $157.002 ezekuta hosi orsamentu $170.565, saláriu funsionariu permanente 63% ho nia saldo $70.980 hosi orsamentu $112,560 no funsionáriu kontratadu 65% ho nia saldo $90.190 hosi orsamentu $138,034.
Maske nune’e, nia katak, ezekusaun orsamentu iha trimestre datoluk ne’e CNFP Becora seidauk bele ezekuta to’o 75%, tanba iha difikuldade balun ne’ebé enfrenta, kona-ba prosesu aprovizionamentu ne’ebé empreza tarde oferese ekipamentu.
“Ho ida ne’e, entaun ami-nia pagamentu mós atrazu hosi prosesu ezekusaun ne’e rasik. Tanba loloos, tama ona iha ezekusaun 75%, maibé ami seida’uk to’o target (alvu) ne’ebé loloos ami atinje,” nia dehan.
Entretantu, tuir Xefe Departamentu Administrasaun Finansa, Pedro de Jesus, katak funsionáriu iha CNFP Becora daudaun ne’e hamutuk 68, ne’ebé kompostu hosi funsionáriu permanente 22 no kontratadu 46.
Jornalista : Nelia Fernandes
Editór : Rafy Belo
