Governu hahú buka fatin alternativu ba sidadaun timoroan iha Portugál
DILI, 07 outubru 2022 (TATOLI)— Governu liuhusi Ministériu Koordenadór Asuntu Ekonomiku (MKAE), hahú planu atu buka fatin alternativu urjente ba sidadaun timoroan sira iha nasaun Portugál.
“Ita iha ona hanoin sei buka fatin alternativu urjentemente, ba ita nia sidadaun timoroan sira ne’ebé agora hela Portugal,” hateten Minsitru Koordenador Asuntu Ekonomiku (MKAE), Joaquin Amaral, hateten bainhira hasoru malu ho Primeiru Ministru, Taur Matan Ruak iha Palasiu Governu, sesta nee’.
Tanba tuir nia, Governu seidauk iha hanoin atu repatria ka lori fila sidadaun sira ne’e, maibé buka hakmaan sira nia situasaun ne’ebé mak agora daudaun sira hasoru iha Portugál.
Nune’e, Xefe Governu husu ba Vise Primeira Minsitra no Ministra Solidaridade Sosiál no Inkluzaun, Ministru Prezidensia Konsellu Minsitru, Ministru Justiça, Ministru Defeza, Ministra Negosiu Estranjeiru no Kooperasaun, Vise Minsitru Interiór, Sekretáriu Estadu Formasaun Profisionál no Empregu atu bele buka fatin urjente atu sidadaun sira iha Portugál bele hela provizóriu.
“Ita bele halo estratejia hodi buka solusaun atu ajuda ita nia sidadaun sira ne’ebé mak iha Portugál tanba tempu rai malirin besik ona hodi labele hetan problema iha ne’ebá,” nia afirma.
Governu mós kontinua apela ba ajénsia ka empreza sira ne’ebé haruka ka rekruta traballadór timoroan ba rai li’ur tenke garante garante kondisaun hotu-hotu.
“Ajénsia sira iha direitu hodi halo sira nia atividade negósiu, maibé bainhira mobiliza ema ba rai liur tenke iha kondisaun katak sidadaun ne’ebé mak sira mobiliza tenke iha ninia parseiru sira ne’ebé atu servisu hamutuk iha ne’eba, hodi ema sira iha ne’e bá labele hetan difikuldade,” nia apela.
Governu mós husu ba sidadaun hotu ne’ebé hetan kontaktu husi ajénsia sira ne’ebé mobiliza atu tuir sira ba liur di’ak liu husu informasaun ho di’ak hodi evita hosru situasaun difisil iha diaspora.
Jornalista : Felicidade Ximenes
Editór : Florencio Miranda Ximenes
