IFC apoiu asisténsia téknika ba ANPM hodi esplora kampu Bayu-Undan
DILI,07 outubru 2022 (TATOLI)– Prezidente Autoridade Nasionál Petroleu no Minerál (ANPM), Florentino Mateus Soares Ferreira, hateten International Finance Corporation (IFC), apoiu asisténsia téknika ba ANPM hodi garante esplorasaun mina iha kampu petrolifera Bayu-Undan.
“Ami hamutuk ho IFC, konsege asegura fundu kooperasaun ida atu haree kona-ba, ita nia esforsu hodi esplora potensialidade Bayu-Undan, ne’ebé hanesan kampu ida ne’ebé mak too ona nia rohan husi produsaun. Nune’e ita bele buka tan alternativa ruma hodi kontinua fó reseita mai Timor-Leste,” hateten Prezidente ANPM, hafoin hala’o sorumutu ho Primeiru Ministru Taur Matan Ruak iha Palásiu Governu, sesta ne’e.
Kampu Bayu-Undan hanesan kampu petrolifera úniku iha Timor-Leste, ne’ebé mak durante ne’e fó reseita liuliu osan lubuk ida tama iha fundu petrolifera.
Maibe, Prezidente ANPM ne’e dehan kampu petrolifera sei hala’o produs ba iha tempu balun, nune’e prepara atu ba futuru halo armazenamentu.
“Polítika ne’e tentantiva mundiál atu rezolve problema alterasaun klimátika nian, iha fatin hotu hotu atu halo redusaun ba CO2 iha mundu. Timor-Leste sai hanesan nasaun ne’ebé kiik, maibé hakarak partisipa hodi kontribui ba iha redusaun karbonu iha mundu,” nia afirma.
Ho asuntu ne’e, nia dehan bele eleva Timor Leste, hodi tau iha fatin a’as ba prosesu atu kompromete ba redusaun CO2 iha mundu, aumezmu tempu jere mós reseita ba Timor-Leste, fó oportunidade empregu ba timoroan sira.
“Ida ne’e alterativu ne’ebé mak pozitivu tebes ba nasaun ne’e, atu iha sustentabilidade reseita husi indústria petroliferu nian,” katak.
Tanba ne’e, Primeiru Ministru, Taur Matan Ruak apresia IFC nia servisu tomak, no servisu ne’ebé konsege hatuur no fiar katak kooperasaun ho parseiru sira sai boot liután.
‘IFC sei regula no koloka rasik tékniku sira ne’ebé mak ajuda TL, hodi intende didi’ak ba enkuadramentu reguladór jerál nia no mós ba rejime fiskál, ne’ebé ita fornese ho nune’e projetu ne’ebé mak di’ak liután.
Jornalista : Felicidade Ximenes
Editór : Florencio Miranda Ximenes
