Janeiru-outubru 2022, PNTL-VPU rejista kazu 38 iha Covalima
COVALIMA , 07 outubro 2022 (TATOLI) – Polisia Nasional Timor Leste (PNTL) Munisipíu Covalima Seksaun Unidade Ema Vulneravel (VPU-Vulneravel Person Unit), durante fulan janeiru to’o outubru 2022 rejista ona kazu 38.
“Ha’u iha dadus kompletu ne’ebé rejistu iha PNTL-VPU hahú janeiru to’o outubru 2022, rejista ona kazu hamutuk 38. Hosi kazu sira ne’e iha 36 haruka ona Prokuradór no rua seluk seidauk entrega. Tanba, liga ba kazu sensitivu no sei buka evidénsia hodi halibur sasin,” Xefi Investigasaun PNTL Covalima Seksaun Unidade Ema Vulneravel, Primeiru Sarjentu Polisia Amelia de Jesus Amarál hatete ba jornalista iha Santa-Rosa, sesta ne’e.
Maske prosesu PNTL-VPU Covalima haruka ba Ministeriu Publiku, maibé nia prosesu PNTL-VPU asesu nafatin informasaun liuhosi Alfela ho Fokupers hodi bele hatene bainhira mak halao prosesu julgamentu.
Nia dehan durante ne’e, PNTL-VPU servisu hamutuk ho Alfela, Fokupers, PRADET, uma mahon Salele ho MSSI (Ministeriu Solidariedade Sosial no Inklusivu).
Primeiru Sarjentu Polisia Amelia fo sai katak, antes ne’e iha tinan 2021, kazu ne’ebe rejistu iha 80 to’o 90. “ Maibe agora ne’e komesa redus ona. Kazu sira ne’e PNTL VPU Covalima rejistu mai hosi postu administrativu hitu (7) iha Covalima,” dehan nia.
Jornalista : Celestina Teles
Editóra : Armandina Moniz
