MAE inaugura sede suku Babulo iha Manufahi
DILI, 07 outubru 2022 (TATOLI) –Ministru Administrasaun Estatál (MAE), Miguel Pereira de Carvalho, kinta ne’e, inaugura sede suku Babulo iha Postu Administrativu Same, Manisípiu Manufahi.
“Sede suku ne’e konstrui husi setór privadu no finansia hosi Orsamentu Jerál Estadu (OGE) tinan 2022, luihusi Programa Planeamentu Dezenvolvimentu Integradu Munisipál (PDIM) Munisípiu Manufahi ho montante orsamentu $77,748.58,” Ministru Administrasaun Estatal, Miguel Pereira de Carvalho, dehan liuhusi nota komunikadu ne’ebé Agência Tatoli, asesu, ohin.
Governante ne’e hateten, Xefe Suku, Konsellu Suku no komunidade sira hotu-hotu iha Suku Babulo tanba ho kontribusaun osan $7.000 liu hodi harii suku refere.
“Ohin ita inaugura Sede Suku Babulo, estabelese instrumentu sira hodi garante oinsá povu ne’e bele moris ho di’ak. Instrumentu ida-ne’e mak estabelese atu garante para servisu administrasaun públika ida-ne’ebé maka deskonsentradu katak Governu sentrál labele hala’o servisu de’it iha Dili,” nia dehan.
Serimónia inagurasaun ne’e akompaña husi Ministru bá Asuntus Parlamentár no Komunikasaun Sosiál, Francisco Martins da Costa Pereira Jerónimo, Administradór Munisípiu Manufahi, Administradór Postu Administrativu Same Vila hamutuk ho Lideransa Komunitária no mós Diretor Jerál Arkivu Nasionál no Diretor Nasionál Apoiu Administrasaun Suku inklui dirijente sira iha munisípiu, Diretór Servisu Munisipál, Prezidente Konsellu Veteranu Munisípiu Manufahi, Prezidente KRAM, Grupu ONG Munisípiu Manufahi, Komandante PNTL Munisípiu Manufahi hamutuk ho Komandante Operasionál, Komandante F-FDTL Komponente Navál Postu Betano, veteranu no lian-na’in sira, Póroku Same, lideransa komunitária hamutuk ho Konsellu Suku no komunidade iha suku refere.
Jornalista : Osória Marques
Editór : Cancio Ximenes
