Top

MAE inisia konkursu Sentru Akollamentu Multifunsaun

Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 07 outubru 2022 (TATOLI) – Ministériu Administrasaun Estatal (MAE) hahú loke ona konkursu públiku kona-ba implementasaun projetu Sentru Akollamentu Multifunsaun.

“Ho ida-ne’e mak liuhosi reuniaun Konsellu Ministru delibera ona, nune’e MAE hahú inisia konkursu Sentru Akollamentu Multifunsaun”, Ministru Administrasaun Estatal, Miguel Pereira de Carvalho, dehan ba Agência  Tatoli, liuhosi telefone, ohin.

Ministru esplika bainhira konkursu ba empreza hotu ona no hetan ona empreza vensedór mak hafoin halo konstrusaun ba sentru ida ne’e.

“Agora iha prosesu prosedimentu aprovizionamentu, ami sei bolu empreza sira atu aprezenta proposta ho dezeñu depois mak halo konstrusaun, signifika empreza ne’ebé mak manan sei aprezenta dezeñu ba ADN hodi hetan aprovasaun”, afirma.

Governante espera katak iha dezembru konkursu bele konklui ona no kustu finál ne’e depende mós ba dezeñu ne’ebé empresa dezena.

“Ami iha estimativa katak sentru ne’e sei gasta osan besik milaun $7 maibé depende hosi empreza iha”, nia dehan.

Tuir nia sentru ida ne’e sei konstrui iha mota kiik Hera nian, rai ho medida 2.5 hektare hosi totálrai ho hektare 15.

“Sentru ida-ne’e, ita sei halo iha mota kiik Hera nian, ne’ebé sei halo iha rai ho medida hektare 2.5 hosi totál hektare 15”, katak.

MAE hatutan Sentru Akollamentu ne’e tuir baze lokál katak Ministériu Planu no Ordenamentu (MPO) mak sei halo konseitu, MAE sei hola parte ba prosesu aprovizionamentu no Autoridade Munisípiu Dili mak sei jere sentru ne’e.

Notisia relevante :  Governu finaliza ona dezeñu detalladu ba sentru akollamentu multifunsaun

Jornalista : Osória Marques

Editór : Zezito Silva

Publisidade

Leave a Reply

Latest Post

error: Content is protected !!