BAUCAU, 07 outubru 2022 (TATOLI) – Sekretariadu Tékniku Administrasaun Eleitorál (STAE) Munisipiu Baucau, destaka fungisionáriu kontratadu na’in-12 hodi trata kartaun eleitorál ba eleitór sira iha postu administrativu neen.
Diretór STAE Baucau, Lúcio Freitas Salvador, esplika, pesoál funsionáriu na’in-12 ne’e hahú hetan kontratu iha fulan-agostu no efetivu serbisu iha fulan-setembru, ne’ebé kada postu admistrativu dezloka na’in-rua, kompostu hosi ofisiál operadór sistema na’in-ida no asistente operadór na’in-ida.
“Ajuda tebes tanba lori ona sistema hakbesik ba sira, uluk sentraliza de’it iha munisípiu entaun inan-aman sira iha área rurál atu dezloka mai munisípiu susar uitoan tanba iha limitasaun ekonomia,” Diretór STAE Baucau informa ba Tatoli iha Vila Nova, sesta ne’e.
Prezensa pesoál hirak-ne’e iha postu administrativu atu halo resensianentu eleitorál inklui atualiza dadus eleitór, hodi hafasil komunidade hakbesik prosesu administrasaun ba baze.
Resensiamentu eleitorál no atualiza baze dadus nu’udar atividade kontinuasaun hodi atualiza no parte hosi preparasaun ba eleisaun parlamentár iha tinan 2023.
STAE nia papél seluk mak atu akumula dadus ema ho defisiénsia sira iha kada suku nune’e STAE hamutuk ho parseiru UNDP sei kria kondisaun iha eleisaun parlamentár 2023.
Desizaun ne’e foti bazea ba prekupasaun ne’ebé hato’o hosi asosiasaun ema ho defisiénsia, liuliu defisiente matan sira kona-ba kondisaun hanesan sentru votasaun no buletin votu ne’ebé difikulta atu ezerse direitu votu.
“Ita iha planu atu halo preparasaun ba ida-ne’e, nune’e UNDP mak ajuda hodi elebora dadus hirak-ne’e,” Lúcio Salvador akresenta.
Pesóal hirak-ne’e halao kna’ar iha ekritóriu administrasaun postu no bainhira dezloka ba suku presiza pedidu hosi autoridade suku, liuliu fó prioridade ba idozu sira no ema ho defisiénsia fíziku tanba labele halo movimentu.
Kritéria inportante ba eleitór sira atu kompleta mak presiza dokumentu hanesan Billete Indentidade (BI), sertidaun moris RDTL no Pasaporte bazea ba lei númeru 19/2021, artigu 23.
Pesóal hirak-ne’e sei halo kna’ar ho duransaun fulan-tolu, hahú hosi setembru to’o novembru, bazea ba kontratu ne’ebé halo no posibilidade sei estende iha fulan-dezembru ka janeiru 2023.
Jornalista : Natalino Belo
Editór : Evaristo Soares Martins
