MANUFAHI, 07 outubru 2022 (TATOLI) – Embaixadór Uniaun Europeia ba Timor-Leste, Marc Fiedrich, Nasaun Unida nia Koordenadór iha Timor-Leste, Roy Trivedy, Diretór Jeral Agrikultura no Irrigasaun, Maria Odete do Céu Guterres, Reprezentante FAO, Paula Lopes da Cruz, no Administrador Munisípiu Manufahi, Arantes Isaac Sarmento, entrega tratór-liman unidade 15, roller, no atreladu, no mákina dulas batar unidade tolu ba grupu agrikultór husi Betano, Dotic, no Umaberloi.
Mákina no ekipamentu hirak ne’e atu ajuda habelar konservasaun agrikultura iha Manufahi no mós ajuda halo prosesamentu batar depois kolleita.
Iha ninia diskursu abertura, Administradór Munisípiu Sarmento hato’o ninia bem-vindu ba Embaixadór UE foun ba Timor-Leste iha ninia primeira vizita ba Manufahi no agradese UE tamba ajuda ona inisiativa konservasaun agrikultura liuhusi projetu ‘Pro-Resilience II’ ne’ebé implementa ona husi Ministériu Agrikultura no Peskas (MAP) hamutuk ho Organizasaun Nasaun Unida ba Ai-han no Agrikultura (FAO).
“Agrikultór sira iha Manufahi sente ona benefísiu barak tebes husi konservasaun agrikultura, inklui hamenus-gastus hodi halo preparasaun rai no hamós du’ut, habokur rai, no hasa’e produsaun kolleita to’o tríplu (katak aas liu 3x) kompara ho prátika halo to’os tradisional,” Sarmento haktuir.
Nia mós mensiona oinsá mákina dulas batar hirak ne’e bele fó benefísiu ba agrikultór sira liuhusi aumenta tan ninia valór-adisionál no hasa’e uma-kain sira-nia rendimentu.
Uniaun Europeia haksolok hodi servisu hamutuk ho Timor-Leste iha área agrikultura no adaptasaun ba mudansa klimátika no kompromete ona atu ajuda agrikultór sira-nia esforsu hodi bele sai reziliente liu tan.
“Grupu Agrikultór ba Konservasaun Agrikultura tau atensaun maka’as ba asuntu igualdade jéneru. Ha’u hein katak depois simu tiha trator-liman, sira sei pratika liu-tan téknikas konabá konservasaun agrikultura no agrikultór sira sei hasa’e sira-nia produsaun batar no hetan tan rendimentu hodi fó benefísiu ba sira-nia família no komunidade,” Embaixadór, Marc Fiedrich, hateten, kinta nee, iha Manufahi.
Tratór-liman hamutuk unidade 55, roller no atreladu ne’ebé sosa ka halo iha Timor-Leste atu benefisia projetu nia benefisiáriu sira. Trator-liman ne’ebé sosa husi Indonézia, enkuantu roller no atreladu sira halo lokalmente iha Ofisina Dom Bosco no Bendix, liuhusi halo-tuir ekipamentu ne’ebé mak semellante ho ekipamentu ne’ebé halo iha Xina. Roller no atreladu sira liu ona husi teste iha kampu (Betano) hodi sukat sira-nia kualidade no kompatibilidade molok entrega ba agrikultór sira.
Grupu agrikultór ida-idak eskolla sira-nia membru na’in rua hodi tuir treinamentu kona-ba operasaun bázika no halo manutensaun ba ekipamentu sira antes entega ba grupu. Frota dahuluk kompostu husi tratór-liman unidade 30, roller, no ninia atreladu sira entrega ona ba grupu agrikultór sira ne’ebé mai simu iha Betano iha 28 jullu 2022.
Jornalista: Filomeno Martins
Editór: Rafy Belo
