MANUFAHI, 07 outubru 2022 (TATOLI)–Diretór Eskola Sekundária Tékniku Vokasionál Agríkola Halibur-Betano, Vicente Tilman, hateten, eskola daudaun ne’e laiha bee-moos hodi hala’o atividade prátika no seluk tan.
“Alunu sira lori bee hosi uma, nune’e enxe tanke hodi sira uza filafali,” Diretór eskola informa bainhira partisipa iha kampaña kombate hoax hodi promove internet saudável no diseminasaun literasia dijitál ne’ebé maka halo’o iha eskola ne’e, sesta (07/10).
Nia haktuir, antes ne’e iha empreza balun mak halo ona perfurasaun bee iha eskola maibé la hetan bee.
“Bainhira sira halo perfurasaun mosu fali tasi-been, nune’e labele uza ba rega modo sira ne’ebé maka estudante sira kuda iha eskola ne’e,” nia haktuir.
Notísia relevante: Eskola iha Dili hahú prepara kondisaun
Estudante iha eskola ne’e hamutuk 153 no profesór 23 kompostu hosi permanente 10, kontratadu hitu no voluntáriu neen. Enkuantu, área estudu ne’ebé maka hanorin iha eskola mak hanesan produsaun argríkola.
Iha biban hanesan, Administradór munisípiu Manufahi, Arantes Isaac Sarmento, hateten, parte administrasaun munisípiu Manufahi no Governu sentrál sei rejista preokupasaun sira.
“Ami serbisu hamutuk ho parseiru Luta ba Futuru hodi halo perfurasaun bee iha eskola ne’e maibé la mosu,” nia akresenta.
Aleinde ne’e, parte Servisu Edukasaun Munisipál hamutuk ho Administradór munisípiu Manufahi halo ona estudu iha eskola no hato’o ona proposta ba Ministériu Edukasaun Juventude no Desportu (MEJD) atu haree maibé seidauk iha resposta to’o agora.
Nune’e mós, Sekretáriu Estadu Komunikasaun Sosiál, Merício Juvenal dos Reis ‘Akara’, kompromete, nia parte sei informa problema ne’e ba ministériu tutela atu buka solusaun.
Jornalista : Natalino Costa
Editora : Julia Chatarina
