VIQUEQUE, 09 outubru 2022 (TATOLI) – Reprezenta komisaun rekolla restu mortal, Postu Lacluta, Luis Fernandes Belem Soares, informa dadaun ne’e uma mahon ne’ebé rai restu mortál Ue-Kfia ho kondisaun grave iha tempu udan, udan been tama uma laran.
“Dadaun ne’e ita haree kondisaun uma mahon grave ona. Tanba kalen sira dodok hotu ona nune’e iha tempu udan, udan been tama uma laran, depois anin boot mós tama hotu mai uma laran. Uma ne’ebé dadaun agora rai ne’e ha’u-nia uma mak uza hodi rai restu mortál ba iha laran”, Luis Fernandes Belem Soares, hateten ba jornalista sira, iha sede uma mahonn, Ue-Kfia, postu Lacluta, domingu ne’e.
Luis hatutan, uma mahon komisaun rekolla restu mortál Ue-Kfia didin ho piku ne’ebé kuaze dodok ona.
“Uma mahon ninia didin ami didin ho piku de’it, maibé udan kona hela de’it ne’e kuaze dodok hotu ona. Kondisaun didin mós ami sente la dum seguru. Primeiru ami rai uluk saudozu sira-nia ruin iha uma tali ida, maibé uma tali dodok tiha nune’e ami muda fali saudozu sira-nia ruin iha tinan 2018 hodi tau iha uma mahonn agora, maibé kondisaun agora grave tan ona”, nia hato’o.
Aleinde ne’e, nia dehan, Postu Lacluta hahú rekolla restu mortal sira iha tinan 2010 no agora iha Uma Mahonn Ue-Kfia saudozu sira nian ruin hamutuk 217 maka dadaun sei rai hela iha sede Ue-Kfia laran.
“Ami hahú rekolla restu mortál iha tinan 2010 agora dadaun ne’e saudozu nian ruin totál hamutuk 217 sei rai iha ne’e. Depois reativa fila fali komisaun rekolla restu mortál ami hamutuk 247, maibé foin konsege rekolla ona 217 no 376 maka buka seidauk hetan”, nia relata.
Nia dehan, restu mortál balun hosi munisípiu seluk hanesan Manatuto, Baucau, Likisa, Same Ainaru, inklui munisípiu Viqueque hosi postu haat nian iha hotu uma mahonn sentru Ue-Kfia
komisaun hetan rai iha uma mahon depois sira mai foti fali sira nin.
“Restu mortál la’os postu Lacluta nian de’it, maibé balun hosi munisípiu seluk nian ami hetan tau hotu iha ne’e. Depois aban bain-rua ita halo serimónia entrega maka foin entrega ba família hosi saudozu sira-nia hodi lori saudozu sira restu mortál ba fatin moris”, dehan.
Kona-ba prepara fatin ba jardín postu Lacluta , nia dehan, komisaun restu mortál identifika ona no sekretariu estadu asuntu veteranu mai haree ona rai ne’ebé atu kria jardín.
Jornalista : Vitorino Lopes da Costa
Editór : Zezito Silva
