VIQUEQUE, 09 outubru 2022 (TATOLI) – Konservatóriu Serbisu Rejistu Notariadu (CSRN) Munisípiu Viqueque, ohin domingu ne’e, halo atendimentu ba Billete Identidade (BI) no sertidaun moris iha postu Uatulari.
Diretór munisipál Konservatóriu Serbisu Rejistu Notariadu (MCSRN), Anaceto Moreira, hateten atendimentu ne’e direta ba Postu Adiministrativu Uatulari hodi fasilita komunidade sira trata sira nian dokumentu.
“Ohin ami hahú halo atendimentu, prodúz dokumentu hanesan BI no sertidadun moris nian iha Postu Uatulari, atu ita-nia komunidade sira liuliu sira ne’ebé labele la’o ba munisípiu sira bele mai trata sira-nia dokumentu”, Aniceto Moreira, hateten ba jornalista Agência Tatoli, iha Postu Uatulari.
Aniceto Moreira hatutan atendimentu ne’e durante loron sanulu iha Postu Uatulari no kada suku ida halo atendimentu durante loron ida.
“Nune’e ami husu ba komunidade sira iha Postu Uatulari aproveita hakbesik-an mai postu hodi trata imi-nia dokumentu sira hanesan BI no sertidaun moris”, nia hato’o
Nia dehan daudun ne’e rejistu notariadu hahú ona halo atendimentu ba Suku Uaitame no aban Ministru Justisa (MJ) maka sei lansa iha Uatulari, maibé ohin hahú trata abitante sira hosi suku Uaitame.
Iha biban ne’e adiministradór Postu Uatulari, Manuel do Rosario, hatutan agora oportunidade di’ak ba abitante sira Uatulari tanba Rejistu Notariadu direta mai postu ne’ebé ba abitante sira ne’ebé seidauk trata nia dokumentu.
“Ida-ne’e oportudade di’ak ba abintante postu Uatulari, mai aproveita trata dokumentu sira hanesan BI no sertidaun moris. Tanba durante ne’e iha Munisípiu Viqueque, maibé agora sira mai ona ne’e di’ak liu mai besik hodi trata dokumentu”, nia informa.
Iha fatin hanesan, Xefe Suku Uaitame, José do Rosario, haktuir atendimentu ida-ne’e sente di’ak ona tanba komunidade sira ne’ebé durante susar iha Munisípiu Viqueque agora sira bele mai trata besik sira nian dokumentu.
“Ha’u hanoin atendimentu ida-ne’e ami autoridade sente di’ak no fasilita ona ita-nia abitante sira bele trata sira nian dokumentu. Tanba durante ne’e ita-nia komunidade sira labele ba halo sira-nia dokumentu ne’e tanba distánsia dook balun la’o labele”, José subliña.
Nia relta Suku Uaitame, abitante idozu purvolta 200-resin maka hahú halo sira nian dokumentu BI no sertidaun moris.
Tuir observasaun jornalista Agência Tatoli, iha postu Uatulari nota katak abitante hosi idozu sira antuasizmu trata sira nia dokumentu no akompaña hosi xefe suku Uaitame no adiministradór postu Uatulari. kuaze tuku 07:30 dader, loron 9 fulan outubru 2022 komunidade Uaitame iha ona Postu Uatulari trata sira-nia dokumentu BI no sertidaun moris. Ohin atendimentu hahú tuku 08:00 sei ramata lokraik tuku 05:30.
Jornalista: Vitorino Lopes da Costa
Editór : Zezito da Silva
