COVALIMA, 10 Outubru 2022 (TATOLI) – Populasaun hosi Postu Administrativu Fohorem Munisípiu Covalima uza estrada públiku iha suku Fohorem, aldeia Sadahur nakfila sai fatin merkadu ba negosiánte sira halo negosiu.
“Ita-haree komunidade uza estrada sai hanesan fatin merkadu ida-ne’e fó impaktu bo’ot ba movimentu transporte públiku no komunidade sira. Tanba ne’e ami husu parte relevante atu tau atensaun ba komunidade sira-nia preokupasaun,” komunidade Agusto dos Santos de Araújo Sarmento hateten ba jornalista iha merkadu Fohorem, Covalima.
Nia dehan, ho kondisaun merkadu ida-ne’e bainhira tempu udan komunidade sira la uza no sira tuur de’it iha estrada ninin. Tanba fatin la dignu ba negosiante sira atu faan sasan iha estrada ninin.
Tanba ne’e, nia hateten nu’udar autoridade lokal tenke buka solusaun nune’e negosiante sira-ne’e halo negosiu iha fatin ne’ebé dignu.
Parte seluk, Xefi Suku Fohorem, Fernando Ferreira rekuñese komunidade utiliza estrada públiku sai hanesan fatin merkadu ho nune’e haree ba kondisaun la seguru ba komunidade sira atu halo negósiu no fatin la’os komunidade sira foin mak uza maibe uja iha tempu naruk ona.
“Ida-ne’e mak kondisaun merkadu Fohorem. Ita haree fatin la seguru ba komunidade sira atu halo negósiu ho ida ne’e sai hanesan prokupasaun mós ba xefi suku sira tanba merkadu ne’e la dignu ba komunidade sira atu halo negósiu,” nia dehan.
Ho kondisaun merkadu ne’e, Xefi Suku mós kordena ona ho administrador munisipiu atu muda merkadu ne’e maibé seidauk identifika fatin nune’e estrada públiku sai hanesan fatin merkadu ba abitante sira.
“Ha’u rasik kordena ona ho administradór postu administrativu hodi buka fatin. Maibe seidauk identifika nafatin no sei uza estrada sai hanesan merkadu maibé bainhira iha tempu udan sira labele halo negósiu,” nia hateten.
Postu administrativu Fohorem Munisípiu Covalima, iha suku hanesan, Fohorem, Laktos, Dato-rua no Dato tolu .
Jornalista : Celestina Teles
Editor :Armandina Moniz
