iklan

NASIONÁL, DILI, HEADLINE, OÉ-CUSSE (RAEOA), POLÍTIKA

PA RAEOA-MEKAE diskute atu estabelese zona franka haforsa polítika ZEESM

PA RAEOA-MEKAE diskute atu estabelese zona franka haforsa polítika ZEESM

PA RAEOA ho MEKAE deskuti atu estabelese zona franka haforsa polítika ZEESM. Imajen Tatoli/Abílio Elo Nini.

DILI, 10 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano no Ministru Koordenadór ba Asuntu Ekonómiku (MEKAE), Joaquim Amaral, segunda ne’e realiza enkontru espesiál hodi diskute kona-bá planu atu estabelese zona franka iha Oé-Cusse hodi haforsa polítika Zona Ekonómia Espesiál Sosiál Merkadu Timor-Leste (ZEESM-TL).

“Ohin, ha’u mai hasoru ministru hanesan Koordenadór ba Asuntu Ekonómiku, diskute hela iha posibilidade atu kria zona franka iha Oé-Cusse, ideia-ne’e ita rona ona, tanba Prezidente Repúblika mós ko’alia beibeik ona, foin daudaun ho Prezidente Repúblika Indonézia, Jokowi, ko’alia tiha ona kona-ba asuntu ne’e,” Arsénio Bano, ko’alia ba Agência Tatoli hafoin enkontru iha restaurante Aru Bakeri, Praia dos Coqueiros, Dili.

Prezidente Autoridade RAEOA ne’e informa, kona-bá asuntu ne’e Governu liuhosi Primeiru Ministru iha ona koñesimentu, tan autoridade RAEOA sei dezloka Indonézia iha fatin Labuan Bajo, hodi hasoru Governur NTT, atu diskute kona-bá kooperasaun entre rai rua ne’e, espesiál ba Oé-Cusse Ambeno.

“Iha semana ne’e ita sei ba bodi haree took ideia ne’e atu serbisu hamutuk ho Indonézia ne’e oinsá, maibé ne’e depois ita sei haree MEKAE mós, sei serbisu hamutuk ho RAEOA atu haree asuntu la’o oinsá,” nia afirma.

“Nia di’ak ne’e ita tenke haree ba oin, dezenvolvimentu iha área fronteira ne’e to’o iha-ne’ebé ona, ita atu lori zona fronteira ne’e, atu lori Oé-Cusse oinsá, tanba ita iha Rejiaun Espesiál, ita-mós iha ZEESM TL, entaun iha posibilidade ita atu aselera dezenvolvimentu iha zona fronteira nian tenke maka’as liután,” autoridade garante.

Ministru Koordenadór ba Asuntu Ekonómiku (MEKAE), Joaquim Amaral, hateten, Timor-Leste iha Zona Espesiál ida naran ZEESM TL, presiza aselera dezenvolvimentu ne’ebé eziste ona iha Zona Espesiál ida-ne’e tanba Oé-Cusse baliza direita ho Indonézia,

Tuir Governante ne’e katak, razaun atu aselera tanba foin daudaun ne’e Prezidente Repúblika hala’o vizita ba Jakarta, Prezidente na’in-rua halo deklarasaun ida, oinsá rai rua ne’e bele serbisu hamutuk promove dezenvolvimentu iha rai ketan Oé-Cusse tanba fronteira direita.

“Ne’ebé iha asuntu rua maka sei ko’alia ho dezenvolvimnetu fronteira ida maka dezenvolvimentu parke indústria iha zona fronteira ida seluk kona-bá livre komérsiu koñesidu ho zona franka, ne’ebé sei hola fatin iha Oé-Cusse,” Governante ne’e hateten.

Tan ne’e maka aproveita Prezidente Autoridade RAEOA atu ko’alia kona-bá potensialidade saida maka iha Oé-Cusse liuliu infraestrutura sira, nune’e poténsia lokál, fatin sira-ne’ebé bele instala zona komérsiu livre ne’e hanesan faze inisiál, entaun presiza diskute, liuliu Prezidente RAEOA tanba dezenvolvimentu hahú ona iha Oé-Cusse.

“Ne’ebé ha’u rona ona hosi Prezidente Autoridade potensialidade hosi nível infraestrutura, potensialidade produtu no komoditas sira-ne’ebé Oé-Cusse iha, nune’e dezenvolvimentu fronteira ne’e tenke bazea ba iha poténsia rekursu sira-ne’ebé iha, ida-ne’e ohin ami diskute entre Prezidente ho MEKAE,” nia katak.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!