BOBONARO, 10 outubru 2022 (TATOLI)-Padre Parókia Santa Cruz Maliana, Valerio Gusmao, domingu ne’e fó bensaun ba karreta oporasionál hamutuk unidade 14 iha komandu Polísia Nasionál Timor-Leste munísipiu Bobonaro atu nune’e bele fó matak malirin ba membru polisía sira utiliza ba kualkér atividade seguransa.
Serimónia bensaun ba viatura hirak-ne’e iha ámbitu distribuisaun karreta opersionál foun hamutuk unidade haat ba eskudara postu administrativu Lolotoe, Atabae, Balibo no eskuadra Bobonaro ne’ebé Ministériu Interior (MI) sosa iha tinan ne’e.
Biban ne’e, amu pároku fó bensaun ba edifísiu Unidade Ema ho Vulnerável (VPU) ne’ebé inaugura ona hosi Sekretária Estadu Igualdade no Inkluzaun (SEII), Maria do Rosário Fátima Correia, iha loron 22 fulan-jullu tinan 2022.
Notísiaisia relevante: PNTL Bobonaro avalia serbisu kampaña no eleisaun volta dahuluk
Komandante PNTL munisípiu Bobonaro, Superintendente Antóninho Mauluta, apela ba membru ne’ebé kondúz karretaa hirak-ne’e atu utiliza ho respondablidade tuir regra ne’ebé fó-sai ona hosi komandu Jerál Polísia Nasionál Timor-Leste.
“Ha’u husu karreta sira-ne’e kuandu atu para tenke fase moos, cek oléu sira-ne’e ita tenke kuidadu sasán sira-ne’e hanesan ita-nia aan rasik, tanba nia mak atu hatutan ita-nia liman-ain, nia maka atu apoiu ita-nia serbisu ba susesu. Sé ita la kuidadu nia to’o tempu nia aat serbisu hotu la’o ladi’ak,” nia hateten iha ámbitu serimónia distribuisaun.
Nia husu kondutór sira tenke kontrola tabela kilometrajen ne’ebé iha, bainhira halo movimentu ba mai tenke prienxe nune’e bele hatene gastu ba kombustível no fasilita halo manutensaun.
Maluta mós apela ba komandante eskudara sira atu kontrola membru ne’ebé kondús karreta nune’e bele uza tuir regra no labele tula tula família iha oras serbisu ba interese privadu.
“Ha’u husu ba komandante eskudara sira atu orienta didi’ak ba membru sira ne’ebé lori karreta, komandante sira mós tenke tau matan ba karreta sira-ne’e to’o tempu ruma tenke ser halo pasa revista ba karreta ninia kondisaun,” nia fó hanoin.
Komandante ne’e dehan, presiza duni membru sira kontrola viatura hirak-ne’e tanba iha tempu badak ekipa konjunta hosi nasionál sei mai halo inspesaun no auditoria iha komandu munisípiu Bobonaro kobre eskudra postu administrativu Atabae, Balibo, Maliana, Cailaco, Bobonaro no Lolotoe.
Notísia relevante: PNTL Bobonaro halo tán apreensaun ba motorizada 21 iha Nunura
Jornalista: Sérgio da Cruz
Editór: Evaristo Soares Martins
