DILI, 10 outubru 2022 (TATOLI)-Prezidénsia Repúblika iha proposta Orsamentu Jerál Estadu (OJE) ba tinan fiskál 2023 prevee ho montante $12,088,413 hodi prioritiza programa prioridade lima.
Xefe Kaza Sivíl Prezidénsia Repúblika, Bendito Freitas, ho ekipa segunda ne’e halo audénsia ho komisaun A trata asuntu Justisa no Konstituisional iha Parlamentu Nasionál (PN) hodi aprezenta proposta OJE 2023 hosi Prezidénsia Repúblika nian.
“Ohin, ami mai audénsia ho komisaun hodi aprezenta OJE 2023 hosi Prezidénsia Repúblika ho programa prioridade lima”, dehan Bendito Freitas ba jornalista sira iha PN hafoin audénsia.
Tuir livru anexu XI planu anuál ba serbisu no entidade setór públiku administrativu, Prezidénsia Repúblika prevee programa prioridade lima mak;, programa Estadu direitu prevee $238, 987 ho nia sub-programa koezaun no prestíjiu defeza seguransa ho nia atividade ida, sub-programa promosaun direitu umanu nia atividade nomeasaun kandidatu ba atribuisaun prémiu Sergio Vierra de Mello.
Daruak, programa boa-governasaun jestaun instituisional $7,658,859 ho nia sub-programa boa-governasaun ho atividade rua, sub-programa jestaun instituisional nia atividade neen.
Datoluk, programa promove identidade nasionál prevee $1,009,378, ho nia sub-programa apoiu promosaun língua portugés no tetún ba língua fortalesimentu koezaun povu Timor-Leste ho atividade dokumentasaun no publisidade, sub-programa fortalese valór rezisténsia no valorizasaun patrimóniu kulturál povu TL ho nia atividade eventu serimoniál, promove arte no kultura, valoriza sidadaun nia kontribuisaun, sub-programa promove kultura no seguransa nasionál iha sosiedade timorense ho atividade sensibilizasaun, palestra, serimónia kona-ba asuntu defeza no seguransa.
Dahaat, programa reforsa relasaun no kooperasaun internasionál prevee $1,361,189 ho sub-programa vizita nasaun multilaterál nia atividade mak halo vizita internasionál ba nasaun sira reforsa relasaun estratéjika, vizita kortezia Xefe Estadu, vizita internasionál hodi reforsa relasaun estratéjika diplomásia defeza.
Dalimak mak programa dezenvolvimentu inkluzivu no sustentável prevee $1,820,000, ho sub-programa diálogu komunitáriu ho atividade vizita ofisiál Xefe Estadu nivél nasionál, sub-programa promosaun apoiu dezenvolvimentu ekonómiku sustentável ho atividade enkontru, semináriu no konferénsia, sub-programa desiminasaun informasaun kona-ba prevensaun kontra kankru ba susun, nutrisaun ba inan-feton no komunidade, atividade desportu inisiativa PR.
Bendito Freitas, hateten Prezidente Repúblika iha kooperasaun ho Governu di’ak ba ezekusaun atividade sira ne’e. “Prezidénsia nia papél atu fó akompañamentu, akonselamentu, advokasia serbisu ho parseira próxima ho Governu atu bele atinje prestasaun serbisu másimu ba povu iha nesesidade serbisu liuliu ba saúde, má-nutrisaun, saúde infántil inan sira-nian ho oinsá mak ita apoiu ba pre-eskolár dezenvolvimentu sedu liu ba labarik sira ne’e hanesan atividade importante prezidénsia nian”.
Tuir portál Ministéiru Finansa (MF), iha segunda ne’e (10/10/2022), fó sai katak Prezidénsia Repúblika nia OJE 2022 ho orijen $10,088,413.00, kompromosiu sira $201,874.27, obrigasaun sira $1,126,967.42, atuál $5,070,136.86, saldu $3,689,434.45 no ezekusaun atinji ona 61.4%.
Notísia relevante: OJE 2022, Prezidénsia Repúblika propoin millaun $10-resin
Jornalista : Nelson de Sousa
Editora : Rita Almeida
