Projetu PMOPA faze daruak, Jaime : pagamentu ba traballadór halao ona
COVALIMA, 10 outubru 2022 (TATOLI) –Xefi Finansas Postu Adminisrativu Fohorem, Munisípiu Covalima, Jaime dos Santos Pereira, dehan prosesu pagamentu ba traballadór sira ne’ebé implementa Programa Mão de Obra Postu Administrativu (PMOPA) faze daruak halao ona.
Xefi Finansas Jaime koalia lia hirak ne’e ba jornalista iha edifísiu Postu Administrativu Fohorem, Covalima, segunda ne’e.
“Ami hosi postu administrativu Fohorem halo ona pagamentu ba implementasaun PMOPA faze daruak ba traballadór sira no agora finaliza ona,” nia dehan.
Nia fo sai katak, bazeia ba dadus traballadór sira-ne’e kada aldeia ema na’in-20. Ho nune’e hosi postu Fohorem iha suku Fohorem, Laktos, Dato-rua no Dato-tolu.
“Ita konta kada suku grupo haat iha kada aldeia ema na’in-20, ne’ebé ha’u la dekor. Maibe, tuir buat ne’ebe hau hatene implementasaun PMOPA faze dahuluk nian involve trabaldór na’in- 460 kompostu hosi Feto 160 no mane 260. Maibé faze daruak nian to agora seidauk hatene ninia total hamutuk hira,” nia informa.
Antes ne’e, iha loron 26 setembro 2022 , Administradór Munisípiu Covalima hateten, bazea matadalan implementasaun programa PMOPA faze dahuluk uza ona orsamentu 50%. Kada postu administrativu ida hetan alokasaun orsamentu rihun $100-resin. Total orsamentu implementasaun PMOPA iha postu hitu (7) hamutuk $782.000.
Implementasaun PMOPA iha postu administrativu sira-ne’e prióridade ba halo manutensaun no hamos esgotu, manutensaun ba estrada, no limpeza iha fatin públiku.
Jornalista : Celestina Teles
Editor : Armandina Moniz
