DILI, 10 outubru 2022 (TATOLI) – Diretór Nasionál Asisténsia Sosiál (DNSA), Lucas Tois, dehan benefisiáriu ba programa bolsa da mãe jerasaun foun hamutuk 5.477 iha Rejiaun Administrtaiva Espesiál Oé-Cusse Ambeno (REAOA) sei simu subsídiu, semana ne’e.
“Semana ne’e ita halo pagamentu ba ita-nia benefisiáriu RAEOA nian”, Tois dehan ba Tatoli, iha nia knaar fatain Caicoli, segunda ne’e.
Hosi númeru ne’e, resposável dehan inan isin-rua 556 ho nia osan $8.340,00, labarik 4.905 ho nia osan $98.100,00 no labarik defisiénsia hamutuk na’in-16 ho nia osan $160,00.
Nune’e mós, benefisiáriu hosi Ainaro no Bobonaro nian seidauk bele selu tanba banku sentrál la fó dalan atu Banku Nasionál Komérsiu Timor-Leste hodi selu benefisiáriu bainhira benefisiáriu rasik Billete Identidade (BI) laiha.
“Tanba ne’e, ami só selu de’it mak benefisiáriu hosi RAEOA nian”, nia esplika.
Benefisiáriu Ainaro no Bobonaro nian to’o fulan agostu hamutuk inan isin-rua 832, labarik 6.318 no defisiénsia 11.
Posiblidade Telemor-Telekomsel mak sei halo pagamentu ba benefisiáriu iha Ainaro no Bobonaro nian
Lucas Tois dehan posiblidade Telemor ho Telekomsel mak sei halo pagamentu ba benefisiáriu iha Ainaro no Bobonaro nian tanba BNCTL presiza BI mak foin halo pagamentu.
“Banku Sentrál mak la hatán atu BNCTL halo pagamentu tanba dehan benfisiáriu ida tenke iha BI nune’e bele fasilita no kompleta dokumentu hodi bele simu osan. Nune’e to’o agora Ainaro ho Bobonaro seidauk iha rezultadu atu selu tanba Banku Sentrál mak la hatán”, nia dehan.
Lucas rekorda MSSI bolu fali ona Telemor ho Telekomsel atu halo pagamentu fali ba Ainaro ho Bobonaro nian no daudaun ne’e parte hotu halo hela diskusaun kona-ba asuntu refere.
Maibé ho ida-ne’e, nia dehan Telekomsel presiza fulan ida hodi observa sira-nia ajénsia iha munisípiu rua ne’e, depois sira halo espansaun.
Jornalista : Osória Maruqes
Editór : Zezito Silva
