Grupu empreendedorizmu 76 hosi Baucau hetan fundu hosi SEJD
BAUCAU, 11 outubru 2022 (TATOLI) – Grupu juventude empreendedorizmu munisípiu Baucau hamutuk 76, tersa ne’e, hetan apoia fundu hosi Sekretaria Estadu Juventude no Desportu (SEJD) hodi estímula iha área negósiu.
Sekretáriu Estadu Juventude no Desportu, Abrão Saldanha ‘Nokosiku’, esplika, objetivu establese iha munisípiu ho razaun atu hetan partisipasaun hosi juventude iha baze no ajuda rekupera ekonomia hafoin tinan-rua ba kotuk Timor-Leste hasoru resesaun ekonomia relasiona impaktu krize polítika no pandemia Covid-19.
“Atividade ne’e hodi estímula joven sira atu halo atividade ekonomia hodi kontribui hadi’a ekonomia família no joven sira-nian,” Governante ne’e hateten iha Vila Nova, tersa ne’e.
Tuir dadus sensu populasaun tinan 2015, Timor-Leste maioria populasaun pursentu 74 mak idade produtivu hosi 35 ba kraik ne’ebé maioria laiha kampu traballu no barak mak sai ba rai-li’ur nune’e programa fundu estÍmulu empreendedorizmu sosiál bele fó oportunidade ba setór produtivu hodi kontribui ba ekonomia.
Governante ne’e argumenta, kampu traballu la’ós tenke serbisu iha institusaun maibé setór produtivu mós sai fatin oportunidade ba juventude sira atu envolve direita nu’udar traballadór no kria kampu serbisu no redús dezempregu iha rai-laran.
“Dudu joven sira hodi haree setór produtivu hanesan oportunidade ba vida,” Nokosiku akresenta.
SEJD husu ba autoridade postu no suku atu tau matan ba benefisiáriu sira, liuliu atividade grupu no husu atu grupu empreendedorizmu Baucau utiliza fundu hanesan estímulu negósiu inklui tenke iha responsablidade.
Koordenadór Grupu Gamis hosi postu Quelicai, Armindo Moises sente kontente tanba selesionada nu’udar benefisiáriu fundu estímulu empreendedorizmu sosiál juventude no sei utiliza ho responsablidade. Atividade hosi grupu refere kona-ba hakiak bibi timor ne’ebé estabelese iha tinan 2019.
“Osan ne’e ami sei uza ba konstrusaun luhan no aumenta nesesidade sira seluk,” Armindo Moises hateten.
SEJD rasik aloka orsamentu hamutuk rihun $ 81.100 liuhosi Sentru Juventude Munisípiu Baucau (CJMB, sigla Portugés) ne’ebé sei utiliza ba kustu operasionál hamutuk rihun $6 no rihun $75 sei aloka ba grupu benefisiáriu hamutuk 76 mai hosi postu admistrativu neen iha munisípiu Baucau liuhosi atividade hanesan hakiak ikan, manu, bibi, kafétaria no ortikultura.
Jornalista : Natalino Belo
Editór : Evaristo Soares Martins
