COVALIMA, 11 outubru 2022 (TATOLI)–Joven sira iha Covalima la aseita administradór munisípiu Covalima, Franscisco de Andrade, atu transforma ka deside eis Gedung Wanita sai fatin loke jogu Kasino.
“Tuir opiniaun joven hosi Covalima la aseita administradór nia desizaun atu loke jogu Kasino iha Covalima, maibé nu’udar joven la konkorda bainhira ita-nia administradór munisípiu Covalima transforma salaun Gedung Wanita sai fatin loke jogu Kasino,” Marcelino Cardoso hateten ba Agência Tatoli, iha Santa Rosa, tersa ne’e.
Razaun joven la aseita tanba Gedung Wanita fó impaktu psikolojia ba funsionáriu sira-ne’ebé servisu iha servisu edukasaun Covalima, estudante eskola pre-eskolár, Komandu Polísia Nasionál Timor-Leste (PNTL) no rezidénsia administradór munisípiu rasik.
Autoridade iha hanoin atu loke jogu Kasino ne’e fatin la’ós iha salaun Gedung Wanita maibé autoridade tenke identifika fatin seluk, tanba durante ne’e Gedung Wanita ne’e iha instituisaun no partidu politika sira balun uza hodi hala’o atividade.
“Ita uza fatin ida-ne’e sai hanesan fatin jogu Kasino ne’e ha’u sente ladún kondis no fatin ne’e ita haree la merese atu loke jogu. Se bainhira atu loke jogu Kasino tenke identifika fatin seluk,” nia dehan.
Koordenadór Partidu Frente Mudança Covalima, Bento de Jesus Piedade, husu administradór munisípiu Covalima, Francisco de Andrade, halo intervensaun nune’e labele fó biban ba kompañia Timor Holding atu loke jogu Kasino iha Covalima.
“Ha’u husu ba administradór atu husu ba Ministériu Justisa kansela kompañia ne’ebé mak atu halo reabilitasuan ba Gedung Wanita ida-ne’e tanba sei hatudu imajen ne’ebé mak ladi’ak ba Covalima-oan sira,” nia dehan.
Tanba, tuir nia, Gedung Wanita durante ne’e la abandonadu maibé tanba laiha atensaun hosi Governu lokál iha hanoin atu reabilita Gedung Wanita, fatin atu uza hala’o enkontru la’ós fatin kompañia atu loke jogu Kasino ne’ebé fó benefisiu ba grupu balun de’it.
Jornalista : Celestina Teles
Editór : Cancio Ximenes
