Misaun ramata, Roy Trivedy despede ho PM Taur
DILI, 11 outubru 2022 (TATOLI) – Koordenadór Rezidente Nasaun Unida iha Timor-Leste, Roy Trivedy, tersa ne’e, hala’o despedida ho Primeiru Ministru, Taur Matan Ruak, tanba kompleta ona misaun durante tinan lima iha Timor-Leste.
“Ohin, ha’u mai halo despedida formal ida ho Primeiru Ministru tanba ha’u nia mandatu iha ne’e, hahú 2018 to’o agora ramata ona, ne’ebé ha’u sei husik Timor-Leste, iha loron 16 outubru,” dehan Koordenadór Roy Trivedy, iha Rezidénsia Xefe Governu iha Farol-Dili.
Iha ámbitu despedida ne’e, nia agradese ba apoiu tomak ne’ebé Primeiru Ministru haraik ba nia durante mandatu tinan-lima ne’ebé la’o ho susesu tebes.
“Agradese tebes ba apoiu Primeiru Ministru nian durante ne’e di’ak tebes, ha’u sei husik Timor -Leste, maibé ema ne’ebé atu troka ha’u nia fatin sei to’o Timor-Leste iha novembru agora, tanba agora nia sei servisu hela iha Nova Iorke ne’ebé novembru nia to’o ona Timor – Leste, ami kontaktu malu ona atu intrega hela servisu ba nian durante tinan lima tan,” katak.
Ho nune’e, onra bo’ot ba nia liu hosi konfiansa balun ne’ebé fó hosi Estadu Timor-Leste ba nia hodi serbisu ba povu Timor-Leste durante tinan lima.
“Durante ha’u mai iha Timor – Leste servisu la to’o tinan tama ona iha situasaun blokeadu liuliu Covid-19 no seluk tan, maibé ho grasa Maromak nian buat hotu la’o di’ak nafatin,”nia agradese. .
Tuir nia haree Timor-Leste iha progresu dezenvolvimentu ne’ebé la’o di’ak no iha mudansa kompara ho 2018 ba kotuk.
“Progresu dezenvolvimentu iha nasaun ne’e di’ak ona maibé labele toba dukur, tenke servisu nafatin, kapasita iha área oi-oin hodi dudu prosesu dezenvolvimentu la’o lais tan, kapasita maka’as iha edukasaun ida ne’e mak save importante ba Timor-Leste nia susesu,”nia afirma.
Maske, nia dehan mandatu hotu ona iha Timor-Leste, maibé kontinua apoia nafatin iha servisu saida de’it mak Organizasaun Nasaun Unida (ONU) nian hodi suporta ema hotu iha Timor-Leste.
nia afirma bainhira fila nia sei hela no servisu iha Reinu Unidu no iha ne’abé timoroan barak hela iha Inglaterra, nune’e promote sei nafatin apoiu no suporta traballadór timoroan hirak ne’e.
“Ha’u fila hela iha United Kingdom (UK) ha’u bele suporta servisu Embaixada Timor-Leste nian iha ne’ebá kualkér maneira hodi tulun timoroan sira,” nia kompromete.
Alende ne’e, nia mós fó obrigadu ba povu no Estadu Timor-Leste ne’ebé durante ne’e apoiu masimu tebes sira nia servisu.
Jornalista: Hortencio Sanchez
Editór : Florencio Miranda Ximenes
