BAUCAU, 11 outubru 2022 (TATOLI) – Autoridade suku Abo, postu administrativu Quelicai, munisípiu Baucau sei hahú konstrusaun Uma Kbiit Laek (UKL) faze daruak liuhosi programa nasionál dezenvolvementu suku (PNDS) iha fulan-outubru tinan 2022.
Xefe suku Abo, Fidelis Sarmento dos Santos, esplika, liuhosi konsellu suku finaliza ona prosesu verifikasaun no deside xefe família na’in-sia mak sai benefisiáriu ba subsídiu programa UKL faze daruak tanba prienxe kritéria no daudaun ne’e tama ona ba faze kuotasaun ba kompañia fornesedór materiál konstrusaun no kontratu badaen.
“Sei implementa iha fulan ida-ne’e tanba ami iha suku projetu PNDS barak entaun nu’udar ema iha limitasaun nune’e presiza fazeadamente,” Xefi suku Abo hateten iha Vila Nova, tersa ne’e.
Ekipa verifikadór mai hosi konsellu suku koordena hosi xefe suku inklui Ofisiál Polísia Suku (OPS), xefe aldeia alvu no veteranu deside, bazea ba matadalan UKL-PNDS nian hodi halo selesaun dokumentu, liuliu estatutu na’in ba rai.
Benefisiáriu sira kategória vulnerável ne’ebé kada aldeia sei konstrui uma tolu kompostu hosi aldeia Abo-damena, Matebian no Abu-lir ne’ebé tuir planu sei konstrui uma haat ho medida metro 38 kaudradu no lima seluk medida 48 metru kuadradu ho totál orsamentu hamutuk rihun $ 145.
“Ha’u apresia no kongratula VIII governu tanba implementa programa UKL hodi minimiza komunidade kbiit laek sira-nia nesesidade,” Fidelis dos Santos akresenta.
Suku Abo hamutuk aldeia tolu kompostu hosi Abu-damena, Matebian, Cailerok no Abu-lir ho totál populasaun 2.149 hosi uma-ka’in 505.
Jornalista : Natalino Belo
Editór : Evaristo Soares Martins
