COVALIMA, 12 outubru 2022 (TATOLI)—Administradór postu administrativu Fatumea, munisípiu Covalima, Geraldo Orleans, informa nia parte laiha kuñesimentu kona-ba inisiativa komunidade bainhira loron merkadu ne’ebè monu domingu ne’e, komunidade sira loke jogu bola guling ho kuru-kuru iha merkadu Fatumea.
“Konaba loke jogo iha loron merkadu, hosi xefe aldeia no xefe suku to’o administradór rasik laiha kuñesimentu, tanba ne’e komunidade loke jogu tuir sira-nia hakarak de’it, Tanba laiha autoridade ida autoriza sira, entaun ami la naran ba merkadu ne’e ladún faan produtu lokál,” Geraldo Orleans hateten ba Agência Tatoli, iha resintu Administrasaun Munisípiu Covalima (AMC), Sukaer Laran, kuarta ne’e.
Merkadu Fatumea lokaliza iha aldeia Uma Kiik, suku Belulik Leten, bazea ba autorizasaun munisípiu bandu komunidade loke jogu iha merkadu.
Reprezentante Administradór Munisípiu Covalima, Francisco de Jesus Alves, hateten autoridade Covalima seidauk iha informasaun bainhira komunidade loke jogu iha koron komunidade hasoru malu hodi halo atividade faan no sosa sasán iha merkadu
“Ami seidauk iha informasaun kona-ba komunidade loke jogu Bola Guling no Kuru-Kuru bainhira iha loron merkadu, nune’e ha’u sei hato’o ba ita-nia komandante PNTL munisípiu Covalima atu hapara,” nia dehan.
Komunidade loke jogu Bola Guling no Kuru-Kuru tenke bazea ba autorizasaun hosi Ministériu Komérsiu Turizmu no Indústria (MTCI) bele loke se laiha lisensan ruma entaun tenke taka, tanba merkadu fatin atu halo atividade faan no sosa sasán la’ós fatin atu loke jogu bainhira laiha kuñesimentu hosi administradór postu Fatumea.
“Ha’u kontaktu administradór koordena ho PNTL hodi hapara jogu sira-ne’e. Komunidade uza merkadu sai hanesan fatin jogu, tanba ha’u hanoin ida fó impaktu mak okupa fatin ema atu faan sasán nomós labarik sira mós partisipa hotu,” nia hateten.
Tuir observasaun agência tatoli nota katak loron merkadu iha postu Fatumea monu iha domingu, maibé iha merkadu ne’e rasik komunidade ladún faan sasán produtu lokál, tanba komunidade foku liu loke jogu sira hanesan bola guling no kuru kuru.
Jornalista : Celestina Teles
Editór : Cancio Ximenes
