BOBONARO, 12 outubru 2022 (TATOLI) — Konsellu Kombatente Libertasaun Nasionál (CCLN, sigla portugés) tersa ne’e, halo enkontru ho konsellu munisipál kombatente libertasaun nasionál munisípiu Bobonaro, hodi identifika kombatente balun atu simu kondekorasaun iha ámbitu komemorasaun loron 28 novembru tinan ne’e iha kapitál munisípiu Manatuto.
Iha enkontru ne’e konsege identifika veteranu na’in-50 ne’ebé deside liuhos desizaun koletiva ne’ebé lidera hosi Prezidente CMCLN munisípiu Bobonaro, Jaime Romão dos Santos ‘Dotim’ ho estrutura tomak ne’ebé koñese di’akliu kombatente hirak-ne’e maka merese duni atu hetan kondekorasaun hosi estadu.
Purtantu tipu medalla ne’ebé atu entrega ba kombatente sira mak hanesan orden gerrilla, orden funu-na’in no seluk tán.
“Ami identifika ona ema na’in-50 mak atu hetan kondekorasaun hosi estadu. Kandidatu sira-ne’e maioria laiha problema koná-ba naran no data moris,” Komisaun CCLN ne’ebé responsabiliza hosi Celestino Profirio da Silva, hateten iha Maliana.
Nia akresenta, medalla ne’e iha ninia grau haree ba nia partisipasaun ba funu kombatente ne’e bele hetan 15 a 19 ka 8 a 14, maibé ninia dedikasaun la to’o iha-ne’ebá, ninia partisipasaun mak lori nia bele hetan medalla.
“Depois iha mós sertifikadu no konsellu entrega ba sira ho osan hosi lei aprova ne’ebé atribui ona ba kombatente sira,” nia hateten.
Nia dehan, tuir lolos tinan ne’e la fó kondekorasaun medalla ba kombatente sira, maibé tanba prevee tiha orsamentu atu komemora loron 03 marsu.
Celestino fó-sai katak, bainhira kandidatu sira iha munisípiu hotu-hotu, lista hirak-ne’e ekipa CCLN sei submete ba iha Gabinete Prezidénsia Repúblika, atu hetan kondekorasaun hosi estadu.
Komemorasaun 28 novembru ba tinan 2022 nian sei realiza iha kapitál munisípiu Manauto.
Jornalista : Sérgio da Cruz
Editór : Evaristo Soares Martins
