DILI, 12 outubru 2022 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, aprezenta projetu rezolusaun Governu iha reuniaun Konsellu Ministru (KM), kuarta ne’e, hodi elimina peska ilegál iha portu.
“Konsellu Ministru aprova projetu rezolusaun Governu, ho objetivu atu ratifika adezaun Timor-Leste ba akordu kona-ba medida Estadu Portu nian hodi prevene, impede no elimina peska ilegál ne’ebé la deklara no la regula (PSMA, sigla inglés),” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: KM Sei Estuda Opsaun ba Kriasaun Sistema Autoridade Nasionál Marítima
Inisiativa ne’e sei liuhosi aplikasaun medida ne’ebé efisiente, ho nune’e asegura konservasaun prazu naruk no esplorasaun sustentável rekursu tasi ne’ebé moris inklui ekosistema tasi.
Portavóz Governu dehan, aprovasaun projetu rezolusaun ne’e nu’udar meiu legál ida hodi kontrola peska ilegál sira iha territóriu tasi Timór.
“Meiu seluk maka eziste ona hanesan Autoridade marrítima, Polísia marítima, no Ministériu Agrikultura no Peska mós halo serbisu maka’as no parte komponente nia serbisu maka promove ró ne’ebé dadaun iha ona faze aprovizionamentu hodi halo operasaun ba área peska nian,” nia tenik.
Jornalista : Antónia Gusmão
Editora : Julia Chatarina
