IGE sei normaliza estrada iha postu administrativu Tilomar-Fatumea
COVALIMA, 12 outubru 2022 (TATOLI) –Institutu Jestaun Ekipamentu, Institutu Públiku (IGE, I.P, sigla portugés) sei normaliza estrada iha postu administrativu Fatumea tanba agora IGE normaliza hela estrada iha postu administrativu Tilomar, munisípiu Covalima.
Administradór postu administrativu Fatumea,Geraldo Orleans, hateten agora dadaun IGE halo ona normalizasaun estrada hosi suku Beiseuk, aldeia Maubessi, bairru Hedi Besi tanba kondisaun estrada aat hafoin ba iha Foholulik no ikus liu to’o iha postu administrativu Fatumea.
“Segunda semana oin, IGE sira to’o ona iha Fatumea tanba IGE normaliza kondisaun estrada ne’ebé durante ita sente risku. IGE to’o iha Fatumea simu orientasaun hosi Ministru Administrasaun Estatál (MAE) tanba foin lalais nia mós telfone kedas ha’u atu lori ekipamentu mai, maibé la’os ba direta kedas iha Fatumea maibé normaliza uluk estrada iha postu Tilomar,” Geraldo Orleans informa ba Agência Tatoli, iha resintu AMC, Sukaer Laran, kuarta ne’e.
Intervensaun hosi IGE halo normalizasaun estrada ida-ne’e bele rezolve ona estrada ne’ebé risku liu maibé buat ida kondisaun foho udan, maske normaliza ona estrada balun la signifika ida-ne’e seguru loos ona.
“Ami garante, IGE normaliza estrada hahú hosi postu Tilomar ho Fatumea, sira mai lokaliza iha munisipiu Covalima parte kosta súl iha Covalima kondisaun risku ka rai monu fali, ami telfone direita tanba sira besik,” nia hateten.
Postu Administrativu Fatumea ho nia suku sira hanesan suku Fatumea, Belulik Leten no suku Nanu.
Jornalista : Celestina Teles
Editór : Cancio Ximenes
