COVALIMA, 11 outubru 2022, (TATOLI)—Komisaun Organizadora komemorasaun loron mundiál redusaun risku dezastre iha Covalima, realiza atividade kompetisaun sertame ba komunidade aldeia lima iha suku Suai Loro, postu administrativu Suai. Munizípiu Covalima.
“Ohin loron ita realiza atividade kompetisaun sertame ida ne’e partisipa hosi aldeia lima iha suku Suai Loro, relasiona ho ita komemora loron mundiál redusaun risku dezastre naturál ne’ebé sei monu iha loron 13 fulan outubru tinan 2022,” Prezidente Komisaun Organizadora, Francisco de Jesus Alves, hateten ba jornalista sira iha resintu sede suku Suai Loro, kuarta ne’e.
Atividade sertame ne’e partisipa hosi no ba komunidade hosi aldeia Mane-Ikun, Lo’o, Loro, Akar Laran no Sukabi laran iha suku Suai Loro ne’e, ba sira-ne’ebé mak sai vensedór iha kompetisaun sertame ida sei atribui prémiu.
Bazea ba rezultadu enkontru komisaun organizadora nian, komisaun organizadora sei atribui prémiu ba manán-na’in ne’ebé sai vensedór dahuluk ho prémiu $100, vensedór daruak $75 no vensedór datoluk $50.
Komandante operasionál Autoridade Protesaun sivil, Superintendente Asistente PNTL Nuno Romaldo Gomes, reforsa atividade kompetisaun sertame ida-ne’e, komisaun foti pergunta sei la sees hosi redusaun risku dezastre.
“Iha kompetisaun sertame ida-ne’e, pergunta sei la halai sees hosi oinsá ita-boot sira-nia kontribuisaun no hanoin ba iha redusaun risku dezastre natural kona-ba mitigasaun no prevensaun,” nia hateten.
Nia informa, iha nasionál sei komemorasaun loron mundial redusaun risku dezastre ho tema “Alerta sedu no asaun sedu hodi salva vida”.
Jornalista : Celestina Teles
Editór : Cancio Ximenes
