DILI, 12 outubru 2022 (TATOLI) –Ministru Asuntu Kombatente Libertasaun Nasionál (MAKLN), Júlio da Costa “Meta Mali”, hateten proposta Orsamentu Jerál Estadu (OJE), MAKLN prevee millaun $119,6.
“Osan $119.620.937 ne’e sufisiente ona ba programa no atividade MAKLN nian iha tinan oin. Maibé karik la to’o Governu tuir mai bele halo proposta tanba ami-nia mandatu ne’e sei ramata iha maiu 2023,” Julio da Costa “Meta Mali” hateten bainhira halo audiénsia ho Komisaun F, trata asuntu saúde, seguransa sosiál no igualdade jéneru iha Parlamentu Nasionál (PN).
Nia hatutan, iha tinan oin ne’e MAKLN sei kontinua ho nia programa no atividade ne’ebé mak iha, tanba iha tinan oin ne’e sei kontinua hodi halo verifikasaun ba dadus veteranu rejistadu 2009 nian ne’e sei rezolve iha 2023.
Programa seluk mak haloot restu mortál ne’ebé Governu foin mak haloot iha munisípiu Manufahi, Aileu, Baucau no seluk seidauk haloot hotu nomos kontinua tan bolsa estudu ba veteranu nia oan sira, veteranu sira halo tratamentu saúde iha rai-li’ur no rai-laran,
Hanesan haktuir iha livru anexu XI, planu anuál ba servisu no entidade setór públiku administrativa 2023 nian ne’e, MAKLN iha programa rua (2) mak boa governsaun no jestaun institusionál ho nia osan hamutuk $3,191,361 no igualdade jéneru no inkluzaun sosiál ho nia osan $116,429,576 ho sub-programa neen (6) no atividade hitu (7).
Jornalista : Osória Marques
Editór : Cancio Ximenes
