DILI, 12 outubru 2022 (TATOLI)—Prezidente Asosiasaun Nasionál Produtór Fini Komersiál Timor-Leste (ANAPROFIKO-TL), Ilídio Mau Tersa Mendonça, hateten, sira-nia parte prepara ona fini batar no hare hamutuk tonelada 300 hodi distribui ba agrikultór iha territóriu tomak, tinan ne’e.
“Ami prepara ona fini batar no hare hamutuk tonelada 300, kompostu hosi batar tonelada 140 no hare nakroma tonelada 160. Ami serbisu hamutuk ho Ministériu Agrikultura no Peska (MAP) atu distribui ba komunidade iha territóriu laran inklui Rejiaun Administrativa Espesiál Oé-cusse Ambeno (RAEOA),” Prezidente Asosiasaun hateten iha salaun MAP, kuarta ne’e.
Notísia relevante: Produsaun Fini Batar komersiál iha Tonelada 160
Nia dehan, asosiasaun prepara ona fini batar tonelada 150 no hare tonelada 150 iha tinan kotuk, ne’ebé halo ona distribuisaun no tinan ne’e kontinua ho kuantidade, hein fahe ba komunidade.
“Fini ne’ebé ita fahe kada tinan depende ba MAP liuhosi departamentu alimentár. Sira husu kuatidade hira ami hein fahe tuir ida-ne’e, tanba ne’e ba tinan ne’e tonelada 300,” nia akresenta.
Nia dehan, sira-nia parte rasik tinan-lima ona hapara importasaun produtu tanba ANAPROFIKO-TL rasik iha grupu hamutuk 60 ne’ebé envolve iha laran no ema prodús fini hamutuk 5.657, ne’ebé sira-nia sistema preparasaun hahú prepara rai to’o kolleta ne’e laiha problema.
Jornalista : Arminda Fonseca
Editora : Julia Chatarina
