DILI, 12 outubru 2022 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS) iha proposta Orsamentu Jerál Estadu (OJE) 2023 prevee orsamentu hamutuk millaun $8.
Ministru Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, hateten planu prioridade 2023 ba MAPKOMS mak kontinuasaun harii torre, kontinuasaun ba diversifikasaun hahú hosi análog ba dijitál, nune’e mós kontinuasaun ba enkontru komunitáriu.
“Ami-nia orsamentu ba 2023 milliaun ualu (8) de’it ne’ebé ladun boot, ami sente laiha problema. Ami-nia planu prioridade 2023 mak kontinuasaun ba harii torre, kontinuasaun ba diversifikasaun hahú hosi análog ba dijitál no kontinuasaun ba enkontru ho komunidade iha suku,” Francisco Martins Pereira Jerónimo hateten ba Agénsia Tatoli, hafoin halo audiénsia proposta OJE 2023 ho komisaun A trata asuntu Justisa no Konstitusionál iha Parlamentu Nasionál (PN), Dili., tersa ne’e.
Programa ghirak ne’e, nia dehan, liliu atu disemina informasaun ba komunidade atu komunidade bele hatene informasaun sira-ne’e no sei akompaña loloos saida mak lala’ok Estadu no Governu nian iha rai ida-ne’e,” nia dehan.
Kona-ba politika MAPKOMS sei harii torre hira iha tinan 2023, nia dehan, torre ne’ebé atu harii loloos hamutuk 12 maibé atu halo dala ida de’it ne’e defisil, entaun torre balun sei harii fazeadamente no balun tenke harii iha tinan 2023.
“Entaun, fazeadamente agora harii torre tolu no tinan oin harii tan torre tolu nomos ba oin ho nune’e de’it,” nia hateten.
Tuir livru anexu XI planu anuál ba servisu no entidade setór públiku administrativu, ba 2023 MAPKOMS iha programa garante liberdade espresaun no asesu informasaun ho sub-programa deseminasaun informasaun kona-ba asaun Governu iha programa dezenvolvimentu, ho atividade peskiza index públiku asesu ba meiu komunikasaun sosiál, fortalesimentu servisu komunikasaun sosiál no informasaun Governu, disemina informasaun programa Governu dezenvolvimentu ba públiku iha nível nasionál, munisipál no komunitária no Governu iha povu nia leet (Naroman ba suku).
Sub-programa enkorajementu diversifikasaun meiu komunikasaun sosiál, ho atividade propor politika no elabora lejislasaun iha área komunikasaun sosiál, promove diversifikasaun ba meiu komunikasaun sosiál iha nível munisipál, formasaun téknika iha komunikasaun, konstrusaun torre RTTL hamutuk 12, sei halo iha área Naunil, Codo, munisípiu Lautem, Monte Perdidu iha Viqueque, Hobonaro-Ainaro, Lalimlau iha Ermera, Tapo Tas iha Maliana, Oé-Cusse, Manatuto, Manufahi, Balibo, Maliana no Covalima.
Atividade seluk, fortalese relasaun ho organizasaun media no grupu komunitáriu, fortalesimentu rádiu komunidade, promosaun no konsilidasaun papel RTTL.
Programa boa-governasaun no jestaun institusionál, ho sub-programa boa-governasaun no ho nia atividade planeamentu dezenvolvimentu estrátegiku no orientasaun politika, inspesaun, fiskalizasaun no auditória, koordenasaun ba asuntu parlamentár.
Sub-programa, jestaun institusionál, ho atividade jestaun finanseira, administrasaun no lojistika, planeamentu monitórizasaun no estatistika.
Atividade seluk, jestaun ba rekursu umanu, formasaun no kapasitasaun ba rekursu umanu, aprovizionamentu no jestaun ba kontratu.
Jornalista : Nelia Fernandes
Editór : Cancio Ximenes
