Top

RAEOA prevee millaun $120 iha proposta OJE 2023

Osan Dólar Amérika. Imajen/Espesiál

DILI, 12 outubru 2022 (TATOLI)—Adjunta Prezidente Autoridade Rejiaun Administrativa Espesiál Oé-Cusse (RAEOA) ba Reforsa Instituisionál, Leonia da Costa Monteiro, hateten  iha proposta Orsamentu Jerál Estadu 2023 ne’e RAEOA prevee ho montante millaun $120.

“Proposta OJE ba 2023, RAEOA prevee millaun $120 no nia prioridade boot liu ba kapitál dezenvolvimentu ba projetu sira-ne’ebé mak halo kompleta mai hosi tinan 2022 ba fali 2023 seidauk hotu hanesan konstrusaun eskola, sentru saúde, estrada rurál,’’ Leonia da Costa Monteiro hateten hafoin audiénsia públika OJE 2023 ho komisaun E trata asuntu Infraestrutura, iha Parlamentu Nasionál, kuarta ne’e.

RAEOA mós atualiza ezekusaun OJE 2022 ne’e atinje ona 42% hosi montante inisiál millaun $89.

Nia dehan, tanba iha tinan 2021-2022 mak RAEOA tama sistema jestaun finanseira ne’ebé RAEOA enkuadra ona iha laran, entaun la’o tuir sistema ne’e trimestral, nune’e ezekusaun foin terseiru trimestral foin ezekuta hosi pursentu ne’e no ezekusaun ne’e hodi ezekuta ba selu ba saláriu funsionáriu, serbisu operasionál, kapitál dezenvolvimentu no sira seluk.

Durante audiénsia públika ne’e, deputadu sira kestiona barak prosesu infraestrutura sira-ne’ebé  hala’o iha RAEOA.

Tuir livru anexu XXII elementu informativu kona-ba fundu espesiál dezenvolvimentu RAEOA ho nia investimentu iha 2023 haktuir kona-ba sumáriu despeza RAEOA iha 2023 ho totál tetu orsamentu hamutuk millaun $120 desagrega ba Gabinete Prezidente Autoridade (PA), Adjuntadu Prezidente Autoridade ba Reforsu Institusionál, Adjuntu Prezidente Autoridade  ba Asuntu Sosiál no Sekretária Rejional hitu iha RAEOA no ZEESM.

Totál despeza RAEOA ba 2023 hamutuk millaun $120 ne’ebé kompostu hosi despeza normál millaun $84 (70%) no millaun $36 (30%) ne’ebé konsidera nu’udar Fundu Espesiál Dezenvolvimentu.

Husi total despeza ne’e kontribui hosi despeza pesoál 13.7%, akizisaun bens korrente 13.1%, akizisaun bens korente 16.9%, renda 0.5%, transferénsia korente 2.2%, akizisaun bens kapitál 50%, akizisaun servisu kapitál 0.03% no transferénsia kapitál 3.6%.

Tuir mai detalla despeza RAEOA tuir títulu orsamentu hanesan despeza RAEOA ba desepza hosi títulu orsamentu RAEOA hetan alokasaun hamutuk  millaun $84,  hosi totál ne’e maiória aloka iha akizisaun serbisu kapitál 52.1%, despeza pesoál 18%, akizisaun serbisu korente 17% no resta aloka ba nesesidade seluk nu’udar despeza funsionamentu administrativa.

Despeza Sekretáriu Rejionál Finansa aloka millaun $2.5, hosi ne’e maiória aloka ba despeza pesoal hamutuk 42%, akizisaun serbisu korente 30% no resta aloka ba nesesidade rutina ba funsionamentu administrativu.

Despeza Secretáriu Rejionál Administrasaun aloka millaun $1.8. ne’e maiória aloka ba akizisaun serbisu korente 37%, transferénsia korente 29%, despeza pesoal 19% no resta aloka ba nesesidade rutina ba funsionamentu administrativu.

Despeza Sekretáriu Rejionál Agrikultura no Dezenvolvimentu Rurál  millaun $1.3. maioria aloka ba despeza pesoal 60%, akizisaun serbisu korente 22%, akizisaun bens korentes 13% no resta aloka ba nesesidade rutina ba funsionamentu administrativu.

Despeza Secretáriu Rejionál Edukasaun Juventude no Solidariedade Sosiál millaun $8.6 ne’e  maiória aloka ba despeza pesoál 67%, akizasaun bens korentes 22%, akizisaun bens kapitál 6% no resta aloka ba nesesidade rutina ba funsionamentu administrativu.

Despeza Sekretáriu Rejional Saúde millaun $5.8 ne’ebé maioria aloka ba despeza pessoál 56%, akizisaun serbisu korentes 24%, akizisaun bens korente 15% no resta aloka ba nesesidade rutina ba funsionamentu administrativu.

Despeza Sekretáriu Rejionál ba  Komérsiu no Indústria rihun $532.4 ne’e maiória aloka ba despeza pesoál 68%, akizisaun serbisu korente 20%, akizisaun bens korente 9% no resta aloka ba nesesidade rutina ba funsionamentu administrativu.

Enkuantu Fundu Espesiál Dezenvolvimentu despeza hosi títulu orsamentu Fundu Espesiál Dezenvolvimentu (FED) Oé-Cusse Ambeno hetan alokasaun millaun $36. Hosi total ne’e maiória aloka iha akizisaun serbisu kapitál 45%, despeza pesoál 3%, akizisaun serbisu korentes 26%, akizisaun serbisu korente 17%, transferénsia kapitál 7% no resta aloka ba nesesidade seluk nu’udar despeza funsionamentu administrativu.

Tuir livru anexu XXII elementu informativu kona-ba fundu espesiál dezenvolvimentu RAEOA ho nia investimentu iha 2023 haktuir mós planu asaun anuál hanesan  iha programa dezenvolvimentu  rurál no urbanu ho sub-programa rua no atividade sia.

Programa reforma Estadu ho sub-programa ida no atividade ida, programa seguransa nasionál ho sub-programa ida no atividade rua.

Programa asesu justisa ho sub-programa haat no atividade 11, programa boa-governasaun no jestaun instituisional ho sub-programa lima (5) no atividade 25.

Programa agrikultura ho sub-programa ualu (8) no atividade 28, programa saúde ho sub-programa sia (9) no atividade 33.

Programa dezenvolvimentu no reforsu zona ho tratamentu administrativu no ekónomi espesiál ho sub-programa 14 no atividade 51.

Programa edukasaun no formasaun ho sub-programa 12 no atividade 26, programa igualidade jeneru no inkluzaun sosiál ho sub-programa 19, programa turizmu ho sub-programa lima (5), programa investimentu no diversifikasaun ekonómika iha sub-programa 12.

Enkuantu iha livru anexu XXII elementu informativu kona-ba fundu espesiál dezenvolvimentu RAEOA ho nia investimentu iha 2023 mós haktuir ba planu asaun anuál Fundu Espesiál Dezenvolvimentu (FED) iha programa kultura no patrimóniu ho sub-programa ida no atividade rua (2).

Programa estrada no ponte ho sub-programa ida no atividade tolu, programa bolsa estudu ho sub-programa ida, programa tipu formasaun sira seluk ho sub-programa ida (1) no atividade tolu (3), programa boa-governasaun no jestaun instituisional ho sub-programa ida (1).

Programa eletrisidade ho sub-programa ida (1) no atividade tolu (3), programa aeroportu ho sub-programa rua (2), programa dezenvolvimentu no reforsu zona ho tratamentu administrativu no ekonómiku espesiál ho sub-programa ida (1), programa portu ho sub-programa ida (1).

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!