BAUCAU, 12 outubru 2022 (TATOLI) – Sentru saúde Tirilolo, postu administrativu Baucau Vila, munisípiu Baucau iha fulan-setembru rejista pasiente Infeksaun Vias Respiratóriu Aguda (ISPA) na’in-384.
“Moras ne’e afeta ba ita-nia pasiente sira tanba kauza klima, agora bailoron, anin provoka rai rahun su’ar,” Xefe sentru saúde Tirilolo, Juvinal Américo da Costa, hateten iha Vila Antiga, kuarta ne’e.
Alende IRA, durante fulan-setembru sentru saúde Tirilolo mós rejista pasiente sofre moras diarréa hamutuk pasiente 63, phenomonia (kulit) hamutuk na’in-20 no moras kulit hamutuk na’in-44.
Moras diarréia maioria hosi labarik tinan-lima mai kraik, kauza hosi konsumu hahaan ne’ebé ladún ijiene tanba mai hosi lalar. Moras diarréia akontese hosi lalar tanba hahan iha meja la taka nune’e pasiente sira konsumu hodi hamosu moras refere.
Juvinal da Costa, esplika, hosi tipu moras tolu refere maioria afeta ba labarik tinan-lima mai kraik tanba klima hanesan tempu bailoron rai-rahun barak, hahaan ne’ebé konsumu ladún ijiene.
Sentru SaúdeTirilolo mós enfrenta menus ai-moruk hanesan amoxolin, ampecilin, cotri no OBH nune’e parte responsável hato’o ona pedidu ba servisu saúde Baucau hodi atende pasiente sira-ne’ebé hala’o tratamentu iha fatin refere.
“Ami-nia aimoruk sempre menus, dalaruma pasiente balun husu reseita no ami husu orientasaun bele, ami fó reseita ba sira sosa rasik ai-moruk iha klínika privadu sira,” Juvinal da Costa akresenta.
Jornalista : Natalino Belo
Editór : Evaristo Soares Martins
