Sentru saúde Zumalai menus estoke ai-moruk Paracetamol
COVALIMA, 12 outubru 2022 (TATOLI)—Sentru Saúde Postu Administrativu Zumalai Munisípiu Covalima menus estoke aí-moruk Paracetamol tanba iha farmásia hela de’it ona tableta 300.
“Ami-nia preokupasaun, primeiru menus estoke ai-moruk Paracetamol. Tanba iha farmásia falta de’it ona tableta 300. Ida-ne’e uza semana ida hotu ona no estoke ai-moruk iha SAMES menus entaun ladún distribui aí-moruk mai iha Covalima,” Xefe Sentru Saúde Postu Zumalai, Cipriano de Jesus dos Santos, hateten ba Agência Tatoli, iha resintu AMC, kuarta ne’e.
Tanba, nia dehan, aí-moruk Paracetamol uza diária maibé estoke ai-moruk menus iha postu saúde mai to’o iha munisípiu ida difikulta médiku no parteira sira atu halo atendimentu ba pasiénte sira iha sentru saúde Zumalai.
Durante ne’e, xefe sentru saúde Zumalai hato’o ona preokupasaun ne’e ba iha responsável farmásia munisípiu nian maibé to’o agora sei prosesa hela.
Aleinde sentru saúde menus estoke aí-moruk sentru saúde mós hasoru difikuldade hanesan menus rekursu umanu no laiha konvustível ba médiku sira atu hala’o servisu, nune’e médiku sira uza osan privadu hodi ense konvustível ba sira-nia motor hodi hala’o servisu loro-loron.
“Ho difikuldade laiha konvustível ami uza rasik uza ami-nia osan privadu hala’o servisu hodi halo atendimentu ba komunidade. Durante ne’e, kada trimestrál simu komvuztível litru 200, maibé iha sentru saúde motor hamutuk 10-resin entaun mina la to’o. Tanba ne’e, kada trimesterál ami presiza litru 500, nune’e ami hala’o servisu ho másimu,” nia dehan.
Tuir dadus pesoal saúde ne’ebè hala’o servisu iha sentru saúde inklui iha help post hamutuk 45 maiória sira internatu hotu no funsionáriu permanente na’in-27.
Jornalista : Celestina Teles
Editór : Cancio Ximenes
