COVALIMA, 13 outubru 2022 (TATOLI)–Reprezentante Administradór Munisípiu Covalima, Francisco de Jesus Alves, husu Governu liu-liu Sekretáriu Estadu Protesaun Sivíl atu fó apoiu ekipamentu ba autoridade protesaun Sivil iha munisípiu Covalima.
“Ha’u hakarak hato’o ba Sekretáriu Estadu Protesaun Sivíl atu bele fó apoiu finanseira, ekipamentu no rekursu umanu iha Autoridade Protesaun Sivil iha munisípiu Covalima ne’e menus,” Francisco de Jesus Alves hato’o liuhosi nia diskursu, iha resintu sede suku Suai-Loro, kinta ne’e.
Razaun husu apoiu ekipamentu tanba durante akontese dezastre naturál ne’e, maske laiha ekipamentu no menus rekursu umanu maibé ho instituisaun sira-nia apoiu konsege responde ba situasaun bainhira akontese dazestre naturál iha Covalima.
Aleinde hetan apoiu hosi instituisaun relevante maibé hetan apoiu mós hosi organizasaun internasionál hodi apoiu ai-han no la’ós ai-han nune’e bele distribui ba komundiade ne’ebé afetadu ba dezastre naturál.
“Durante ne’e ami apoiu malu ho forsa ne’ebé mak iha, maske laiha ekipamentu no menus rekursu umanu, ami konsege responde ba situasaun dezastre natural iha Covalima. Ho prezensa organizasaun internasionál ajuda mós komunidade. Tanba durante akontese dezastre natural seidauk iha komuniade ne’ebé mak lakon vida,” nia dehan.
Sekretáriu Estadu Protesaun Sivil, Joaquim José Gusmão dos Reis Martins hateten, Autoridade Protesaun Sivíl iha Covalima ba futuru presiza halo rekrutamentu, maibé sei husu ba Komisaun Funsaun Públika (KFP).
“Autridade protesaun sivil iha Covalima entermu ekipamentu no rekursu umanu ba futuru ita hakarak halo tan rekrutamentu pesoál, ka husu ba komisaun funsaun públika, ministériu ne’ebé iha rekursu bele fó apoiu iha protesaun sivil. Se halo tan rekrutamentu, ida-ne’e hatodan tan orsamentu,” nia esplika.
Ekipamentu uza dezde tinan 10-resin maibé foin mak halo modernizasaun ba ekipamentu tinan 2023, no iha ekipamentu ba Bombeiru viatura espesiál hamutuk 16 no apoiu hosi Governu Japaun karreta kiik tolu no iha OJE 2022 ne’e sei sosa ró.
Jornalista : Celestina Teles
Editór : Cancio Ximenes
