Komandu F-FDTL hahú prepara proposta subtituisaun ba kargu Xefe Kaza Militár
DILI, 13 outobru 2023 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, hateten daudaun prepara ona proposta subtituisaun hodi troka Tenente Koronel Renilde Guterres Cortereal e Silva, ba asume kargu Xefe Kaza Militár Prezidesiál Repúblika.
“Ha’u prepara ona naran ida ba Xefe Kaza Militár foun no proposta ne’e ha’u sei hato’o ba Prezidente Repúblika liuhosi reuniaun aban, sesta (14/10),” hateten Tenente Jenerál Falur Rate Laek ba jornalista sira bainhira ramata audénsia públiku kona-ba Orsamantu Jerál Estadu (OJE) 2023 ho Komisaun B iha Parlamentu Nasionál, kinta ne’e.
Komandante F-FDTL ne’e dehan sei nomeia veteranu ida ho postu Koronél tuir estatutu militár hodi submeter ba Prezidente Repúblika, José Ramos Horta atubele halo diskusaun, molok halo aprovasaun no nomeasaun.
“Ha’u sei koalia ho Prezidente Repúblika didi’ak kona-ba kargu ida ne’e, molok halo nomeiasaun,” katak.
Entretantu, Xefe Estadu Maiór Jenerál F-FDTL, Tenente Jenerál Falur Rate Laek no Xefe Estadu Maior F-FDTL Komodoru Pedro Klamar Fuik, promove posto Koronel Graduadu ba Tenente Koronel Renilde Guterres Cortereal e Silva hodi asume kargu nu’udar Xefe Casa Militár Palasiu Prezidensiál no Kapitaun Francisco da Silva ba Majór graduadu hodi asume nu’udar ajudante kampu ba Prezidente Repúblika.
Desizaun refere bazeia ba despaisu númeru 008/CEMGFA/F-FDTL/2022, tuir artigu 94 dekretu-lei númeru 33/2022, Setembru, tuir estatutu foun FALINTIL-FDTL nian.
Notísia relevante: Majór Francisco da Silva temporariamente asume kargu Xefe Kaza Militár
Jornalista: Natalino Cota
Editór : Florencio Miranda Ximenes
