DILI, 13 outubru 2022 (TATOLI)—Ministéiru Obras Públika (MOP) iha proposta Orsamentu Jerál Estadu (OJE) 2023 prevee ho montante $181,311,256, hodi implementa ba programa neen.
“Tinan 2023 montante orsamentu ba MOP millaun $181-resin, hosi ne’e millaun $100 sei uza ba EDTL hodi aprovizionaemntu ba kombustivel ba sentru elétrika Hera no Betano, millaun $17 halo fornesimentu bee no saneamentu ba populasaun iha territóriu, millaun $4 ba esforsu atu halo ba prevensaun inundasaun liu-liu halo prezervasaun udan-been maiória iha Dili laran depois munisípiu Viqueque tanba iha ne’eba iha mota rua ne’ebé sempre problema (risku) ho Loes entre Bobonaro ho Likisa. Purtantu laiha prioridade foun ita hotu nafatin esforsu haree ita-nia estrada no ponte lubun ida, foku reabilita estrada boot sira-ne’ebé naksobu iha tinan rua liu ba,” Ministru Obra Públika, Abel Pires, hateten ba jornalista sira hafoin audiénsia públika proposta OJE 2023 ho komisaun E trata asuntu Infraestrutura iha Parlamentu Nasionál, kinta ne’e.
MOP mós atualiza ezekusaun OJE 2022 atinje ona 86.4% hosi montante inisiál millaun $219-resin.
Tuir livru anexu XI planu anuál ba serbisu no entidade setór públiku administrativu, ba 2023 MOP iha programa neen; hanesan programa estrada no ponte prevee $39,681,258 ho sub-programa infraestrutura estrada ponte no kontrola cheias ho atividade 10, sub-programa investe iha planeamentu atualizasaun no manutensaun regulgamentu rede rodoviáriu ho atividade haat, sub-programa dezenvolve no apoiu norma téknika no teste ba konstrusaun no enjenária sivíl ho atividade haat, sub-programa kontrolu kualidade konstrusaun sivíl no obras públika ho atividade ida.
Programa dezenvolvimentu rurál no urbanu prevee $3,611,246 ho sub-programa estabelese no aplika kontrolu konstrusaun ho atividade tolu, sub-programa dezenvolve polítika planementu urbanu ho atividade haat, sub-programa mellora abitasaun nasionál ho atividade rua.
Programa boa-governasaun no jestaun instituisional prevee $16,188,752 ho sub-programa rua no atividade 11.
Programa bee no saneamentu prevee $ 21,000,000 ho sub-programa dezenvolve no manutensaun sistema abastesimentu bee iha área rurál no urbanu ho atividade rua.
Programa eletrisidade prevee $100,000,000 ho sub-programa enérjia elétrika oras 24 ho atividade ida.
Programa igualidade jeneru no inkluzaun sosiál prevee $15,000 ho sub-programa protesaun solidariedade sosiál no inkluzaun ho atividade ida, sub-programa deklarasaun Maubisse ho atividade haat.
Jornalista : Nelson de Sousa
Editór : Cancio Ximenes
